Amerikaning bir qator shaharlarida mamlakatdan noqonuniy muhojirlarni ommaviy deportatsiya qilishga qarshi namoyishlar bo‘lib o‘tdi, deb xabar berdi mahalliy KTLA telekanali.
Aniqlanishicha, eng yirik norozilik namoyishi Los Anjelesda o‘tkazilgan.
Minglab namoyishchilar prezident Trampning ommaviy deportatsiya va immigratsiya bo‘yicha siyosatiga qarshi chiqib, Los Anjelesning tarixiy markazidagi ko‘chalar va 101-trassani to‘sib qo‘ygan.
Bundan tashqari, Kaliforniyaning janubidagi bir nechta shaharlarda va AQSHning boshqa qismlarida ham norozilik namoyishlari bo‘lib o‘tdi, deyiladi xabarda.
Qayd etilishicha, namoyishchilar mamlakatning yangi migratsiya siyosati tufayli AQSHdan deportatsiya qilinishi mumkin bo‘lgan noqonuniy muhojirlarni qo‘llab-quvvatlagan.
Newsweek nashrining xabar berishicha, norozilik namoyishlari Arkanzas, Missuri va Jorjiya shtatlarining shaharlarida ham bo‘lib o‘tgan, biroq “eng keskin” norozilik chiqishlari Texas va Kaliforniyaning bir qator shaharlarida kuzatilgan.
Avvalroq AQSH chegara xavfsizligi masalalari bo‘yicha mas’ul shaxs Tom Homan Tramp prezidentligining dastlabki haftasida AQSHdan 4 mingdan ziyod muhojir chiqarib yuborilganini ma’lum qilgan edi.
AQSHning sobiq prezidenti Jo Bayden davrida mamlakat janubiy chegarasi orqali noqonuniy kirib keluvchilar soni rekord darajaga yetgan edi. AQSH chegara qo‘riqlash xizmatining rasmiy ma’lumotlariga ko‘ra, 2021-yil yanvaridan buyon 8 milliondan ortiq muhojir AQSH chegarasini hujjatlarsiz kesib o‘tgan.
20-yanvar kuni Tramp AQSHning 47-prezidenti sifatidagi ilk nutqida AQSH hududiga noqonuniy shaxslarning kirib kelishini darhol to‘xtatish va millionlab migrantlarni mamlakatdan chiqarib yuborish jarayonini boshlashga va’da berdi. Shuningdek, u mamlakatning janubiy chegarasidagi vaziyat tufayli butun AQSH miqyosida favqulodda holat rejimini joriy etdi.
Izoh (0)