AQSH hukumati migrantlarni sinchkovlik bilan tekshirish doirasida ayrim toifalarning, jumladan, qochqinlarning “grin karta” uchun bergan arizalarini ko‘rib chiqishni vaqtincha to‘xtatdi. Bu haqda Ichki ishlar vazirligiga tayanib, CBS xabar berdi.
AQSH Fuqarolik va immigratsiya xizmati (USCIS) qochqinlar yoki boshpana maqomiga ega migrantlar tomonidan yuborilgan arizalarni ko‘rib chiqishni to‘xtatish bo‘yicha ko‘rsatma bergan. Bu qaror prezident Donald Tramp tomonidan ilgari imzolangan ikki farmonni bajarish doirasida qabul qilingan.
Birinchisi “AQSHga kirmoqchi bo‘lgan yoki allaqachon uning hududidagi chet elliklarni imkon qadar sinchkovlik bilan tekshirishni” nazarda tutadi. Ikkinchi farmon esa Davlat departamentiga Meksika kartellari va jinoiy guruhlarini terrorchi tashkilotlar deb e’lon qilish imkonini beradi.
Tramp ma’muriyati AQSH fuqaroligi, “grin karta” va boshpana olish uchun ariza topshirgan migrantlarning ijtimoiy tarmoqlardagi akkauntlarini ham tekshirmoqchi. USCIS bu “shaxsni chuqurroq tekshirish, qo‘shimcha xavfsizlik choralarini ko‘rish va milliy xavfsizlikni ta’minlash” uchun zarur deb hisoblaydi.
“Grin karta” arizalarini ko‘rib chiqishni to‘xtatish Tramp ma’muriyatining immigratsiya tartiblarini kuchaytirishga qaratilgan navbatdagi qadami bo‘ldi.
Fevral oyida AQSH Ukraina fuqarolaridan migratsiya arizalarini qabul qilishni to‘xtatdi. Cheklovlar Bayden ma’muriyatining xorijliklarga gumanitar sabablarga ko‘ra AQSHda vaqtincha qolishga ruxsat bergan bir nechta dasturlarini qamrab oladi. Bu Lotin Amerikasi fuqarolariga ham aloqador.
Tramp AQSHning immigratsiya siyosatini qat’iylashtirish tarafdori ekanini bir necha bor ta’kidlagan. U 20-yanvar kuni prezidentlik lavozimiga kirishganidan so‘ng Meksika bilan chegarada favqulodda holat joriy etdi. Shuningdek, Ichki xavfsizlik vazirligi Amerika huquq-tartibot idoralari vakolatlarini kengaytirib, ularga noqonuniy muhojirlarni immigratsiya sudining qarorisiz, “tezlashtirilgan tartib” orqali deportatsiya qilish imkonini berdi.
“Grin karta” doimiy yashash huquqini tasdiqlovchi va AQSH fuqarosi bo‘lmagan shaxslarga mamlakatda ishlashga ruxsat beruvchi shaxsni tasdiqlovchi hujjat.
Bunday karta egasi AQSH fuqarosiga deyarli tenglashtiriladi — u istalgan shtatda yashashi va ishlashi, ko‘chmas mulkka ega bo‘lishi, davlat maktabida o‘qishi, nafaqa olishi, mamlakatdan chiqib ketishi va qaytib kelishi mumkin. Ammo saylovlarda qatnasha olmaydi. Shuningdek, u soliq to‘lashi va chaqiruv yoshidagi erkak bo‘lsa, harbiy ro‘yxatga turishi shart. Besh yil o‘tgach, “grin karta” AQSH fuqaroligini olish imkoniyatini ochadi.
Ma’lumot uchun, AQSHning Toshkentdagi elchixonasi DV-2023 (grin-karta) dasturi orqali immigratsion vizalarni taqdim etish bo‘yicha dunyoda 7-o‘rinni egallagan. 2023-yil noyabr ma’lumotlariga ko‘ra, AQSHda o‘tgan ikki yil ichida chegarani noqonuniy kesib o‘tishga uringan 13 mingdan ortiq O‘zbekiston fuqarosi qo‘lga olingan.
Izoh (0)