32 yoshli xonanda va aktrisa Selena Gomes AQSH prezidenti Donald Trampning noqonuniy migrantlarni ommaviy deportatsiya qilish qaroriga javoban ko‘plab oilalar xavf ostida qolishini aytib, o‘zini yig‘idan to‘xtata olmadi. Bu haqda Daily Mail xabar berdi.
“Men butun xalqimga achinaman. U yerda bolalar ham bor. Afsus, men buni o‘zgartirish uchun biror narsa qilishga harakat qilaman, ammo nimadan boshlashni ham bilmayman. Men qo‘limdan kelganicha harakat qilaman, va’da beraman”, dedi xonanda.
So‘ng ijtimoiy tarmoqdagi ushbu posti ostida “Juda afsusdaman” degan yozuv va Meksika bayrog‘ini qoldirdi. Biroq qisqa vaqtda uning videosi o‘chirildi. Shundan so‘ng Gomes quyidagicha xabar qoldirdi:
“Aftidan, insonlarga hamdardlik bildirish normal emas”.
Immigratsiya va bojxona politsiyasi (ICE) ma’lumotlariga ko‘ra, AQSHda olib borilgan reydlarda 956 kishi hibsga olingan, bu raqam Tramp prezidentlikka saylanganidan beri eng katta ko‘rsatkichdir. BBC ma’lumotlariga ko‘ra, reydlar Chikago, Nyuark va Mayami kabi shaharlarda, kengaytirilgan vakolatlarga ega federal agentliklar ishtirokida o‘tkazilgan.
Selena Gomes bir necha yildan beri immigratsiya masalalari bilan shug‘ullanib kelgan. 2019-yilda u Netflix uchun “Hujjatlarsiz hayot” nomli filmga prodyuserlik qilgan. Unda AQSHda noqonuniy tarzda yashab mehnat qilib kelayotgan oilalar haqida so‘z boradi. Filmda Selena o‘z oilasiga oid ma’lumotlarni ham keltirib o‘tgan:
Ma’lum bo‘lishicha, 1970-yillarda uning xolasi yuk mashinasida yashiringan holda Meksika va AQSH chegarasini noqonuniy kesib o‘tgan. So‘ng uning bobo-buvisi hamda otasi ham shu yo‘l orqali AQSHga kirib kelgan.
“Men vatanim kelajagi uchun qo‘rqyapman”, deya ochiq aytdi Gomes.
U meksikalik va amerikalik avlod sifatida mas’uliyat his qilishini va o‘z platformasidan foydalangan holda, ushbu mavzuda baralla gapirishga tayyor ekanini bildirdi. Xonanda ichki qo‘rquv adolat uchun kurashishga xalaqit bermasligi va millionlab odamlar kelajagiga ta’sir qiladigan ushbu muammoni yoritish dolzarb masala ekanligini ham ta’kidladi.
Shuningdek, u bolalarni qamoqda saqlash sharoitlari talabga javob bermasligi va panjara ortida noqulay joylarda ularning holi haqida qayg‘urishi haqida ham alohida qayd etdi.
Trampning migratsiya siyosati haqida
AQSH prezidenti 21-yanvar kuni chegaradagi barcha noqonuniy o‘tish joylari yopilishini ta’kidladi. U AQSH janubiy chegarasi orqali noqonuniy migrantlarning kirishini taqiqlash to‘g‘risidagi farmonni imzoladi. Boshpana izlash bahonasi bilan u yerda qolish huquqini chekladi.
Prezident Ichki xavfsizlik vazirligi, Adliya vazirligi va davlat departamentiga AQSHga janubdan noqonuniy kirayotganlarni chiqarib yuborish choralarini ko‘rishni topshirdi. Pentagon chegaraga qo‘shimcha 1,5 ming askar va vertolyotlar yuborilishini e’lon qildi. Shuningdek, 5 mingdan ortiq noqonuniy migrantlarni deportatsiya qilish uchun aviatsiya taqdim etiladi, ularning oqimi va noqonuniy savdosini to‘xtatish uchun vaqtinchalik va doimiy to‘siqlar quriladi.
Meksika prezidenti AQSHga borish uchun uning mamlakatiga kelayotgan noqonuniy migrantlar o‘z vatanlariga qaytarib yuborilishini aytdi. Meksika AQSHdan noqonuniy migrantlarni olib kelayotgan harbiy transport samolyotini qabul qilishdan bosh tortdi.
Izoh (0)