AQSH prezidenti Donald Tramp Oq uydagi jurnalistlarga Yevropa Ittifoqidan keltirilayotgan mahsulotlarga kelajakda “shubhasiz” boj solig‘ini joriy etish niyatida ekanligini ma’lum qildi.
Boj solig‘ini joriy etamanmi? Sizga to‘g‘risini aytaymi yoki siyosiy javob beraymi? Albatta joriy etaman. Yevropa Ittifoqi bizga nisbatan juda yomon munosabatda bo‘ldi, dedi Tramp.
Siyosatchi YIga nisbatan “juda jiddiy choralar” ko‘rishini qo‘shimcha qildi.
Respublikachining fikricha, YI Qo‘shma Shtatlarga qo‘shilgan qiymat solig‘i masalasida “o‘ta adolatsiz” munosabatda bo‘lmoqda.
Ularning soliqlari yuqori. Ular bizning qishloq xo‘jaligi mahsulotlarimizni ham, avtomobillarimizni ham qabul qilmaydi, lekin o‘zlari bizga millionlab avtomobillarni jo‘natishadi, dedi siyosatchi.
Yevrokomissiya ma’lumotlariga ko‘ra, 2023-yilda YI va AQSH o‘rtasidagi tovar va xizmatlar savdosi hajmi 1,5 trillion yevrodan oshgan. Neft moylari, xom neft, dori-darmon, farmatsevtika preparatlari hamda tabiiy gaz blokning AQSHdan import qiladigan eng ommabop tovarlari hisoblanadi.
Trampning YIga nisbatan boshqa da’volari ham mavjud. Xususan, siyosatchi Yevropa Ittifoqining ruxsatnoma berish tartibidan norozi — uning so‘zlariga ko‘ra, “qandaydir yirik loyihani ma’qullash uchun besh yoki olti yil kutish kerak bo‘lgan”. Shuningdek, u Bryusselni Apple, Google va boshqa Amerika korporatsiyalariga nisbatan jarimalar va monopoliyaga qarshi tergovlar uchun qoraladi.
Respublikachi bir necha bor Yevropa ittifoqidan barcha import tovarlariga yangi 10-20 foizli bojlar joriy etish bilan tahdid qilgan edi.
Bunga yo‘l qo‘ymaslik uchun Bryussel Amerika neft va gazini ko‘proq sotib olishi kerak, deb hisoblaydi Tramp.
Yevrokomissiya “mutanosib ravishda” javob berishga tayyorligini ma’lum qildi, shu bilan birga Yevropa Ittifoqi raisi Ursula fon der Lyayen savdo urushi xavfi fonida “jarlikka qarab poyga qilish”dan saqlanishga chaqirdi.
Tramp 3 ta davlatga bojlar joriy qildi
AQSH Kanada, Xitoy va Meksikadan keltirilayotgan tovarlarga bojxona to‘lovlarini joriy etadi. Prezident Donald Tramp tegishli farmonni 1-fevral kuni imzoladi. U mazkur qarorini noqonuniy migrantlar va giyohvand moddalar kontrabandasi tahdidi bilan izohladi. Bunga javoban Xitoy AQSHni savdo urushi boshlanishidan ogohlantirdi.
Xitoy Tashqi ishlar vazirligi bayonotida “savdo yoki bojxona urushida” g‘oliblar bo‘lmasligi ta’kidlangan.
Qo‘shimcha 10 foiz miqdoridagi bojlar mamlakatlar o‘rtasidagi narkotrafikka qarshi kurashda ikki tomonlama hamkorlikka ta’sir qilishi va unga zarar yetkazishi muqarrar, deyiladi vazirlik xabarida.
Xitoy “yangi bojlarni qat’iyan rad etishi” va o‘z huquq va manfaatlarini qat’iy himoya qilishi uchun “tegishli javob choralarini ko‘rishi”ni ta’kidladi. Endilikda Xitoy Jahon savdo tashkilotiga (JST) AQSHga qarshi shikoyat qilish niyatida.
Izoh (0)