Kanada bosh vaziri Jastin Tryudo 8-yanvar kuni bo‘lib o‘tadigan milliy yig‘ilishga qadar liberallar partiyasi rahbari lavozimidan iste’foga chiqadi. Bu haqda Globo xabar berdi.
Jastin Tryudo 6-yanvar, dushanba kuniyoq Liberal partiya yetakchisi lavozimidan ketishini e’lon qilishi mumkin. Manbalar Tryudo qachon ketishini aniq bilmaydi.
Ammo bu chorshanba kuni bo‘lib o‘tadigan muhim milliy majlisdan oldin sodir bo‘lishi kutilmoqda, deyiladi xabarda.
Tryudo o‘z iste’fosini Liberal partiya fraksiyasi bilan uchrashuvdan oldin e’lon qilishi kerak, aks holda uning iste’fosini partiya a’zolari majburiy qaror sifatida qabul qilishi mumkin. Tryudo Kanada bosh vaziri bo‘ladigan partiyaning yangi rahbari saylangunga qadar hukumatni boshqarishda davom etadimi, hozircha noma’lum.
So‘rovlar shuni ko‘rsatmoqdaki, Tryudo rahbarlik qilayotgan Liberal partiya bu yil o‘tkazilishi kerak bo‘lgan saylovlarda konservatorlarga mag‘lub bo‘ladi. Shunday reytinglar sharoitida tobora ko‘proq liberal parlament a’zolari Tryudoni iste’foga chiqishga ochiq chaqirmoqda.
Dekabr oyidagi so‘rovnomalarga ko‘ra, Per Puayevr boshchiligidagi konservatorlar 44 foiz ovoz olmoqda, Tryudoning Liberal partiyasi esa atigi 21 foiz ovozga ega.
So‘nggi yillarda hukumat rahbarining obro‘si pasayib bormoqda. Tryudoni iqtisodiy qiyinchiliklarni bartaraf etishga qodir emasligi uchun tanqid qilishmoqda: byudjet taqchilligi o‘sishi sharoitida bosh vazir ijtimoiy xarajatlarni oshirishni taklif qilgani nafaqat jamiyatda, balki o‘z partiyasi a’zolari orasida ham norozilik uyg‘otdi. Dekabr oyida moliya vaziri Xristya Friland lavozimidan ketdi va keyinchalik Tryudoni “siyosiy manipulyatsiyalar”da aybladi.
Bundan tashqari, Tryudo hukumati narxlarning ko‘tarilishi, uy-joy bozoridagi tanglik va samarasiz migratsiya siyosati uchun ham javobgar deb hisoblanmoqda.
Tramp bir necha bor Kanadaga tahdid qilgandi
AQSHning saylangan prezidenti Meksika va Kanada tovarlariga 25 foizlik, Xitoynikiga esa 10 foizlik boj joriy etishini aytgandi. Qaror noqonuniy migrantlar oqimi va giyohvand moddalar kontrabandasi bilan bog‘liq. Tramp tegishli bayonotni Kanada bosh vaziri Jastin Tyudo bilan suhbatda ham aytgandi. U agar tegishli chora ko‘rilmasa, Kanada AQSHning 51-shtati, Tryudo esa uning gubernatori bo‘lishini ta’kidlagan. Shuningdek, Kanada Qo‘shma Shtatlarga qo‘shib olingan taqdirda, mamlakatdagi soliqlar 60 foizdan ko‘proqqa pasayishini bildirgan.
Izoh (0)