Kanadaning eng ko‘p aholisi yashaydigan Ontario provinsiyasi bosh vaziri Dug Ford 10-martdan boshlab AQSH prezidenti Donald Trampning savdo urushiga javoban elektr energiyasi solig‘ini 25 foizga oshirdi. Vazir agar Donald Tramp savdo urushini keskinlashtirsa, elektr energiyasini butunlay o‘chirishdan ham qaytmasligini aytdi. Bu haqda Associated Press xabar berdi.
Men narxlarni oshirishdan tortinmayman. Agar Qo‘shma Shtatlar vaziyatni keskinlashtirsa, men elektr energiyasini butunlay o‘chirishdan ham qaytmayman, dedi Ontario bosh vaziri Dug Ford Torontoda bo‘lib o‘tgan matbuot anjumanida.
U bu ishlar uchun AQSH xalqi javobgar emasligini qayd etdi.
Aslida, men bunday qilmoqchi emasdim. Ayniqsa, savdo urushini boshlamagan Amerika xalqi uchun o‘zimni juda yomon his qilyapman. Bunga bir kishi javobgar, bu — prezident Tramp, dedi Ford.
Trampning Kanadaga joriy qilgan 25 foizlik bojlariga tanaffus e’lon qilishiga qaramay, Ontario tariflari o‘z kuchida qolishini aytdi va bir oylik tanaffus noaniqlikdan boshqa narsa emasligini ta’kidladi. Kvebek shahri ham AQSHga elektr energiyasi eksporti bo‘yicha shunga o‘xshash choralar qo‘llashni ko‘rib chiqmoqda.
Michigan davlat xizmati komissiyasining jamoatchilik bilan aloqalar bo‘yicha xodimi Mett Helmsning aytishicha, Ontarioning bu harakati Michigan iste’molchilariga ta’siri kichik bo‘lishi kutilmoqda. Chunki shtatdagi elektr energiyasining asosiy qismi mahalliy kommunal kompaniyalar tomonidan yoki uzoq muddatli shartnomalar asosida ishlab chiqariladi.
Ma’lumot uchun, Ontario Minnesota, Nyu York va Michiganni elektr energiyasi bilan ta’minlaydi.
AQSH—Kanada savdo urushi
Tramp 2025-yilning 4-martida Kanada tovarlariga 25 foizlik boj joriy etishni tasdiqlagan. Tramp bu taklif giyohvand moddalar va noqonuniy migrantlar oqimi bilan bog‘liq muammolarni hal qilish maqsadida amalga oshirilayotganini izohlagan. Kanada ham bunga javoban AQSHdan eksport qilinayotgan tovarlarga 25 foizlik boj joriy qilgan. Ammo 5-mart kuni Tramp bojlar olishda tanaffus e’lon qilib, muddatni 2-aprelgacha cho‘zgan.
AQSH Kanadaning eng yirik savdo hamkori hisoblanadi. Kanada esa AQSH uchun ikkinchi yirik bozor sifatida xizmat qiladi. Ikki davlat o‘rtasidagi savdo aloqalari ko‘p jihatdan avtomobil sanoati va qishloq xo‘jaligi mahsulotlariga asoslangan.
Izoh (0)