Meksika AQSH prezidenti Donald Tramp tomonidan uning tovarlariga 25 foizlik boj joriy etilganiga javoban shunga o‘xshash va yana bir qator choralarni ko‘radi. Bu haqda mamlakat prezidenti Klaudiya Sheynbaum ma’lum qildi.
“Iqtisodiyot vaziriga Meksika manfaatlarini himoya qilish uchun tarif va notarif choralarni o‘z ichiga olgan B rejasini amalga oshirishni topshiraman. Hech narsani zo‘rlik bilan qilma, hammasini aql-idrok bilan qil. Oq uyning bizning hududimizga har qanday tajovuzlarini va jinoiy tashkilotlar bilan aloqadorlikda ayblangan Meksika hukumatiga nisbatan tuhmatini qat’iyan rad etamiz”, dedi Sheynbaum.
Meksika prezidenti AQSHni fentanilga qarshi kurashda hamkorlik qilishga chaqirdi va Meksika qo‘shni davlatlar bilan qarama-qarshilikni istamasligini ta’kidladi. Sheynbaumning ta’kidlashicha, Meksika giyohvand moddalar savdosiga qarshi kurash choralarini ko‘rmoqda: to‘rt oy mobaynida mamlakat hukumati 40 tonnadan ortiq giyohvand moddalarni, jumladan 20 million doza fentanilni musodara qilgan.
U AQSHga mamlakat ichida ushbu muammoga qarshi kurashishni maslahat berdi: Amerika shaharlarida giyohvand moddalar savdosining oldini olish va bunday operatsiyalardan olingan mablag‘larni legallashtirish uchun jazolash choralarini ko‘rish lozim.
“Muammolar tariflar joriy etish orqali emas, balki muzokaralar va muloqot yo‘li bilan hal etiladi. Xuddi so‘nggi haftalarda migratsiya muammosini hal qilish uchun sizning Davlat departamentingiz bilan qilganimizdek; bizning holatimizda — inson huquqlariga hurmat bilan yondashgan hold”, deya xulosa qildi u.
Tramp 3 ta davlatga bojlar joriy qildi
AQSH Kanada, Xitoy va Meksikadan keltirilayotgan tovarlarga bojxona to‘lovlarini joriy etadi. Prezident Donald Tramp tegishli farmonni 1-fevral kuni imzoladi. U mazkur qarorini noqonuniy migrantlar va giyohvand moddalar kontrabandasi tahdidi bilan izohladi.
Bunga javoban Xitoy AQSHni savdo urushi boshlanishidan ogohlantirdi. AQSH Xitoydan import bojlarini yana bir bor oshirgach, Pekin Vashingtonni savdo urushi xavfi haqida ogohlantirdi. Xitoy Tashqi ishlar vazirligi bayonotida “savdo yoki bojxona urushida” g‘oliblar bo‘lmasligi ta’kidlangan.
“Qo‘shimcha 10 foiz miqdoridagi bojlar mamlakatlar o‘rtasidagi narkotrafikka qarshi kurashda ikki tomonlama hamkorlikka ta’sir qilishi va unga zarar yetkazishi muqarrar”, deyiladi vazirlik xabarida.
Xitoy “yangi bojlarni qat’iyan rad etishi” va “o‘z huquq va manfaatlarini qat’iy himoya qilishi uchun “tegishli javob choralarini ko‘rishi”ni ta‘kidladi. Endilikda Xitoy Jahon savdo tashkilotiga (JST) AQSHga qarshi shikoyat qilish niyatida.
Kanada qanday chora ko‘rdi?
Kanada Tramp tomonidan uning tovarlariga joriy etilgan 25 foizlik bojga javoban xuddi shunday choralar ko‘radi. Bu haqda Kanada bosh vaziri Jastin Tryudo ma‘lum qildi.
AQSHdan keltirilayotgan 155 milliard Kanada dollari (106,5 milliard AQSH dollari) qiymatidagi mahsulotlarga 25 foizli boj solinadi. 4-fevraldan 30 milliard Kanada dollari miqdoridagi mahsulotlarga nisbatan, undan uch hafta o‘tgach esa qolgan summaga nisbatan choralar kuchga kiradi. Amerika bojlari ham 4-fevraldan amal qila boshlaydi.
AQSH energiya resurslaridan tashqari barcha Kanada tovarlariga 25 foizlik boj joriy qildi — ularga boj 10 foizni tashkil qiladi. Tryudo kanadaliklarni mahalliy mahsulotlarni xarid qilishga va AQSHga emas, o‘z mamlakatida dam olishga chaqirdi.
Izoh (0)