AQSHdan deportatsiya qilingan yana 10 nafar O‘zbekiston fuqarosi mazkur hafta davomida vatanga qaytariladi. Bu haqda tashqi ishlar vaziri matbuot kotibi Ahror Burhonov ma’lum qildi.
Uning bildirishicha, Kosta Rikaga yuborilishi rejalashtirilgan, lekin vatanga qaytish niyatida bo‘lgan ushbu fuqarolar Nyu York—Toshkent yo‘nalishi bo‘yicha O‘zbekistonga yetib keladi. 24-fevral kuni shunday fuqarolarning 7 nafari Nyu York—Toshkent yo‘nalishi bo‘yicha O‘zbekistonga yetib kelgandi.
Kosta Rika O‘zbekiston, Qozog‘iston, Qirg‘iziston, Pokiston va Hindiston kabi davlatlarning AQSHdan deportatsiya qilingan 200 nafar fuqarosini qabul qilishga rozi bo‘lgandi. Ahror Burhonov diplomatik vakolatxonalar O‘zbekistonning barcha fuqarolariga, ular qayerda bo‘lishidan qat’i nazar, har tomonlama yordam ko‘rsatishini aytgandi.
O‘zbekistonning Vashingtondagi elchixonasi va mamlakatning Nyu Yorkdagi Bosh konsulxonasi uzoq yillardan buyon O‘zbekiston fuqarolarining o‘z vatanlariga xavfsiz deportatsiyasini taʼminlash maqsadida AQSHning tegishli huquq-tartibot idoralari bilan yaqindan hamkorlik qilib kelmoqda. O‘zaro kelishuvlarga asosan, Amerika tomoni deportatsiya qilinadigan fuqarolarining har bir holati haqida tezkorlik bilan xabardor qiladi. O‘rnatilgan amaliyotga ko‘ra, fuqarolar vatanga Nyu York—Toshkent yo‘nalishi orqali qaytadi.
AQSH 970 dan ortiq O‘zbekiston fuqarosini deportatsiya qiladi
Deportatsiya qilinadigan O‘zbekiston fuqarolari soni 975 kishini tashkil etmoqda. Umumiy hisobda, turli davlatlardan 1 445 549 nafar chet el fuqarosi chiqarib yuboriladi. Ular hibsga olinmagan, biroq deportatsiya qilish bo‘yicha yakuniy qaror qabul qilingan. Ro‘yxatda Markaziy Osiyo davlatlari orasida Qozog‘iston (369), Qirg‘iziston (319), Tojikiston (149) va Turkmaniston (40) fuqarolari ham bor.
Izoh (0)