AQSH va Meksika chegarasida chegarachilar va muhojirlar o‘rtasida otishma sodir bo‘ldi. Bu haqda Fox News xabar berdi.
Ma’lum qilinishicha, bir guruh noqonuniy muhojirlar chegarani kesib o‘tmoqchi bo‘lgan, biroq AQSH chegara qo‘riqlash xizmati xodimlari o‘t ochgan va ularni to‘xtatgan. Otishma oqibatida tan jarohati olganlar yo‘q. Otishma AQSH va Meksika o‘rtasidagi Fronton oroli yaqinida yuz bergan. U yerdagi jinoiy faoliyat tufayli Fronton “Kartel oroli” deb ham ataladi. Chegarachilar bilan otishmaga kirishgan muhojirlar narkokartel a’zolari bo‘lishi mumkinligi aytilmoqda.
Trampning migratsiya siyosati
AQSH prezidenti 21-yanvar kuni chegaradagi barcha noqonuniy o‘tish joylari yopilishini ta’kidladi. U AQSH janubiy chegarasi orqali noqonuniy migrantlarning kirishini taqiqlash to‘g‘risidagi farmonni imzoladi. Boshpana izlash bahonasi bilan u yerda qolish huquqini chekladi.
Prezident Ichki xavfsizlik vazirligi, Adliya vazirligi va Davlat departamentiga AQSHga janubdan noqonuniy kirayotganlarni chiqarib yuborish choralarini ko‘rishni topshirdi. Pentagon chegaraga qo‘shimcha 1,5 ming askar va vertolyotlar yuborilishini e’lon qildi. Shuningdek, 5 mingdan ortiq noqonuniy migrantlarni deportatsiya qilish uchun aviatsiya taqdim etiladi, ularning oqimi va noqonuniy savdosini to‘xtatish uchun vaqtinchalik va doimiy to‘siqlar quriladi.
Meksika prezidenti AQSHga borish uchun uning mamlakatiga kelayotgan noqonuniy migrantlar o‘z vatanlariga qaytarib yuborilishini aytdi. Meksika AQSHdan noqonuniy migrantlarni olib kelayotgan harbiy transport samolyotini qabul qilishdan bosh tortdi.
Izoh (0)