Rossiya va Dominikan Respublikasidan bo‘lgan besh nafar muhojir Puerto Riko g‘arbiy qirg‘oqlariga qayiqda yetib borishga uringan paytda qo‘lga olindi. Bu haqda AQSH chegara bojxona xizmati xabar berdi.
Ma’lum qilinishicha, 28-fevral kuni Remi stansiyasi chegara patrul xizmati xodimlari navigatsiya chiroqlarisiz harakatlanayotgan qayiqni aniqlagan. Bojxonachilar politsiyaning dengiz bo‘linmasi bilan bog‘lanib, huquq-tartibot idoralari xodimlari bilan birga qayiq oldigacha suzib borgan.
Kemada besh nafar xorijlik — uch nafar Dominikan respublikasi fuqarosi va ikki nafar rossiyalik, bir erkak va bir ayol bo‘lgan.
Ushbu holat noqonuniy kirishning oldini olish va immigratsiya qonunchiligining takroriy buzilishiga qarshi kurashda biz duch kelayotgan dolzarb muammolarni ko‘rsatadi, dedi bosh patrul Remi Reji Jonson.
Biometrik tekshiruv shuni ko‘rsatdiki, Dominikan respublikasidan kelgan muhojirlardan biri ilgari sodir etgan jinoyatlari uchun deportatsiya qilingan. Rossiya fuqarolari esa keyingi tergov va deportatsiya uchun AQSH Ichki xavfsizlik vazirligiga topshirildi.
Eslatib o‘tamiz, 21-yanvar kuni prezident Donald Tramp inauguratsiya nutqida AQSH va Meksika chegarasida favqulodda holat e’lon qilishini va noqonuniy migratsiyani to‘xtatish uchun armiyadan foydalanishini ma’lum qilgandi.
Yanvar oyi oxirida AQSH immigratsiya va bojxona politsiyasi fuqarolari AQSH hududida noqonuniy bo‘lib turgan va deportatsiya qilinishi kerak bo‘lgan davlatlar ro‘yxatini e’lon qildi. Unda 970 dan ortiq O‘zbekiston fuqarolari bor. Umumiy hisobda, turli davlatlardan 1 445 549 nafar chet el fuqarosi chiqarib yuboriladi.
Deportatsiya qilinadiganlar orasida Meksika (252 044), Gvatemala (253 413), Gonduras (261 651) va El-Salvador (203 822 kishi) yetkachilik qilmoqda
O‘zbekistonning Vashingtondagi elchixonasi va mamlakatning Nyu Yorkdagi Bosh konsulxonasi uzoq yillardan buyon O‘zbekiston fuqarolarining o‘z vatanlariga xavfsiz deportatsiyasini taʼminlash maqsadida AQSHning tegishli huquq-tartibot idoralari bilan yaqindan hamkorlik qilib kelmoqda.
O‘zaro kelishuvlarga asosan, Amerika tomoni deportatsiya qilinadigan fuqarolarining har bir holati haqida tezkorlik bilan xabardor qiladi. O‘rnatilgan amaliyotga ko‘ra, fuqarolar vatanga Nyu York—Toshkent yo‘nalishi orqali qaytadi. Shunga ko‘ra, AQSHdan deportatsiya qilingan 7 nafar o‘zbekistonlik vatanga qaytarildi, yana 10 nafari shu hafta qaytarilishi kutilmoqda.
Izoh (0)