Xitoy AQSHdan import qilinadigan ko‘mir, suyultirilgan gaz, neft, qishloq xo‘jaligi texnikasi va ba’zi avtomobillarga boj joriy qiladi. Bu haqda Xitoy Moliya vazirligi xabar berdi.
Ko‘mir va suyultirilgan gazga 15 foiz, neft, qishloq xo‘jaligi mashinalari hamda avtomobillarga 10 foiz boj solinadi. Tarkibida volfram bo‘lgan mahsulotlarga eksport nazorati choralari joriy etilmoqda.
Bundan tashqari, Xitoy hukumati Calvin Klein, Tommy Hilfiger va Van Heusen brendlariga egalik qiluvchi PVH Corp va genetik testlash sohasidagi mahsulot hamda xizmatlar yetkazib beruvchi Illumina Inc.ni “ishonchsiz” tashkilotlar ro‘yxatiga kiritdi.
Bu choralar AQSH tomonidan Xitoy tovarlariga import bojlarining oshirilishiga javoban ko‘rildi. Bu haqda prezident Donald Tramp oldinroq ma’lum qilgandi.
“AQSHning bir tomonlama bojlarni joriy etishi Jahon savdo tashkiloti qoidalarini jiddiy ravishda buzmoqda. Bu ularga o‘z muammolarini hal qilishga yordam bermasdan qolmay, Xitoy va AQSH o‘rtasidagi normal iqtisodiy hamda savdo hamkorligiga ham putur yetkazadi”, deya ta’kidladi Xitoy Moliya vazirligi.
Xitoyning Valyutani nazorat qilish davlat boshqarmasi (State Administration of Foreign Exchange, SAFE) seshanba kuni Amerika kompaniyasi Google’ga (Alphabet Inc.ga qarashli) nisbatan monopoliyaga qarshi qonunchilikni buzish bo‘yicha tekshiruv boshladi.
Google’ning qidiruv va boshqa bir qator xizmatlari 2010-yildan beri Xitoydagi foydalanuvchilar uchun yopiq, biroq kompaniya mamlakatda ayrim faoliyatlarini, asosan, onlayn reklama sohasida davom ettirmoqda.
3-fevral kuni Tramp jurnalistlarga keyingi 24 soat ichida Pekin bilan muzokaralar bo‘lishi ehtimoli borligini aytgan. Oq uy matbuot kotibi Kerolayn Levittning Fox News’ga ma’lum qilishicha, gap Tramp va Xitoy raisi Si Szinpin o‘rtasidagi suhbat haqida bormoqda.
Tramp 3 ta davlatga bojlar joriy qildi
AQSH Kanada, Xitoy va Meksikadan keltirilayotgan tovarlarga bojxona to‘lovlarini joriy etadi. Prezident Donald Tramp tegishli farmonni 1-fevral kuni imzoladi. U mazkur qarorini noqonuniy migrantlar va giyohvand moddalar kontrabandasi tahdidi bilan izohladi. Bunga javoban Xitoy AQSHni savdo urushi boshlanishidan ogohlantirdi.
Xitoy Tashqi ishlar vazirligi bayonotida “savdo yoki bojxona urushida” g‘oliblar bo‘lmasligi ta’kidlangan.
“Qo‘shimcha 10 foiz miqdoridagi bojlar mamlakatlar o‘rtasidagi narkotrafikka qarshi kurashda ikki tomonlama hamkorlikka ta’sir qilishi va unga zarar yetkazishi muqarrar”, deyiladi vazirlik xabarida.
Xitoy “yangi bojlarni qat’iyan rad etishi” va “o‘z huquq va manfaatlarini qat’iy himoya qilishi uchun “tegishli javob choralarini ko‘rishi”ni ta‘kidladi. Endilikda Xitoy Jahon savdo tashkilotiga (JST) AQSHga qarshi shikoyat qilish niyatida.
Kanada qanday chora ko‘rdi?
Kanada Tramp tomonidan uning tovarlariga joriy etilgan 25 foizlik bojga javoban xuddi shunday choralar ko‘radi. Bu haqda Kanada bosh vaziri Jastin Tryudo ma‘lum qildi.
AQSHdan keltirilayotgan 155 milliard Kanada dollari (106,5 milliard AQSH dollari) qiymatidagi mahsulotlarga 25 foizli boj solinadi. 4-fevraldan 30 milliard Kanada dollari miqdoridagi mahsulotlarga nisbatan, undan uch hafta o‘tgach esa qolgan summaga nisbatan choralar kuchga kiradi. Amerika bojlari ham 4-fevraldan amal qila boshlaydi.
AQSH energiya resurslaridan tashqari barcha Kanada tovarlariga 25 foizlik boj joriy qildi — ularga boj 10 foizni tashkil qiladi. Tryudo kanadaliklarni mahalliy mahsulotlarni xarid qilishga va AQSHga emas, o‘z mamlakatida dam olishga chaqirdi.
Tramp Kanada va Meksikaga nisbatan kuchga kiradigan bojlarni kamida 30 kunga kechiktirdi. Meksika prezidenti Klaudiya Sheynbaum amerikalik hamkasbi bilan telefon orqali suhbatlashganini va ushu kelishuvga erishilganini ma’lum qildi.
Izoh (0)