Meksika prezidenti Klaudiya Sheynbaum yakshanba kuni minglab odamlar to‘plangan mitingda so‘zga chiqib, AQSHni o‘zaro hurmat va muloqotni davom ettirishga da’vat etdi.
Sheynbaumning chiqishi AQSH prezidenti Donald Tramp Meksika tovarlariga qo‘shimcha 25 foizlik bojxona to‘lovlarini joriy etishni bir oyga kechiktirgandan so‘ng bo‘lib o‘tdi.
Poytaxt Mexiko shahridagi Sokalo maydonida o‘tkazilgan mitingda prezident Meksikaning AQSH bilan munosabatlarni o‘zaro hurmat va hamkorlik asosida mustahkamlash niyatida ekanligini bildirgan.
"Biz Meksika va AQSH o‘rtasidagi munosabatlar doimo o‘zaro hurmat va muloqot orqali mustahkamlanib borishiga ishonamiz. Amerika xalqiga shuni aytmoqchimanki, bizda ularga zarar yetkazish niyati yo‘q va hech qachon bo‘lmaydi. Biz ular bilan barcha sohalarda hamkorlik qilishga qat’iy azm qilganmiz," dedi Sheynbaum
Prezident, shuningdek, Meksika yoshlar orasida fentanil tarqalishining oldini olish bo‘yicha AQSH bilan hamkorlikni davom ettirishini ta’kidlagan.
"Biz bu giyohvand modda nafaqat AQSH yoshlariga, balki boshqa mamlakatlar, jumladan, Meksika yoshlariga ham yetib borishini istamaymiz," deya qo‘shimcha qilgan u.
Sheynbaum so‘nggi 30 yil ichida Meksika va AQSH ikkita savdo bitimini imzolaganini eslatdi. U Meksikaning maqsadi nafaqat Shimoliy Amerika, balki butun qit’aning iqtisodiy integratsiyasi ekanligini qayd etgan.
Shuningdek, ikki davlat o‘rtasidagi 3180 kilometrlik chegara haqida ham so‘z yuritib, Meksika va AQSH o‘rtasidagi savdo, iqtisodiy va madaniy aloqalarning muhimligini bildirgan.
1-fevral kuni AQSH prezidenti Donald Tramp Kanada, Xitoy va Meksikadan keltirilayotgan tovarlarga bojxona to‘lovlarini joriy etishni nazarda tutuvchi farmonni imzolagandi. U mazkur qarorini noqonuniy migrantlar va giyohvand moddalar kontrabandasi tahdidi bilan izohlagandi.
Bunga javoban Klaudiya Sheynbaum Meksika tomonidan javob tarzida shunga o‘xshash va yana bir qator choralarni ko‘rilishini bildirgandi.
6-mart kuni AQSH prezidenti Donald Tramp 2020 yilgi savdo kelishuvi doirasida Meksika va Kanada tovarlariga nisbatan 25 foizlik bojlarni to‘xtatib qo‘yishini aytgandi.
Izoh (0)