AQSH prezidenti Donald Tramp Kanada armiyaga yetarlicha pul sarflamayotganini aytdi, deb xabar bermoqda Oq uy matbuot xizmati.
Tramp buni Kanada Amerikaning yordamiga umid qilayotgani bilan izohladi. U, shuningdek, Kanadani AQSHning qo‘llab-quvvatlashisiz “yashashga qodir bo‘lmagan mamlakat” deb atadi.
Biz ularni yiliga taxminan 200 milliard dollarga subsidiyalaymiz. Agar biz buni to‘xtatsak, bojlar joriy etish hisobiga ularga mashinalar ishlab chiqarishga ruxsat bermasak, ular mustaqil yashashga qodir bo‘lmagan mamlakat bo‘lib qoladi, deydi Luizianaga safari chog‘ida Tramp jurnalistlarga.
AQSH yetakchisi o‘z mamlakati bilan “ajoyib munosabat”da bo‘lgan Kanada xalqini yaxshi ko‘rishini ta’kidladi. Uning so‘zlariga ko‘ra, davlat uchun eng yaxshi yechim “AQSHning 51-shtati bo‘lish”dir.
Kanada mamlakatga sun’iy chegarasiz qo‘shilsa, juda yaxshi bo‘lardi, deb qo‘shimcha qildi Tramp.
Kanadaning Amerika shtatiga aylantirilishi haqidagi gap-so‘zlar Trampning AQSH prezidenti lavozimiga rasman kirishishidan oldin boshlangan edi. U davlatlar o‘rtasidagi chegarani “sun’iy chiziq” deb atadi va Kanadaning qo‘shilishi “milliy xavfsizlik uchun yaxshiroq” bo‘lishini aytdi.
Trampning Kanadani AQSH tarkibiga qo‘shib olish haqidagi bayonotlari
Tramp 5-noyabr kuni bo‘lib o‘tgan saylovlarda g‘alaba qozongach, Kanadaga tahdid qilishni boshladi. Siyosatchi dastlab Meksika va Kanada tovarlariga 25 foizlik, Xitoynikiga esa 10 foizlik boj joriy etishini aytgandi. Bu noqonuniy migrantlar oqimi va giyohvand moddalar kontrabandasi bilan bog‘liq.
Tramp tegishli bayonotni Kanada bosh vaziri Jastin Tyudo bilan suhbatda ham bildirgandi. U agar tegishli chora ko‘rilmasa, Kanada AQSHning 51-shtati, Tryudo esa uning gubernatori bo‘lishini ta’kidlagan. Shuningdek, Kanada Qo‘shma Shtatlarga qo‘shib olingan taqdirda, mamlakatdagi soliqlar 60 foizdan ko‘proqqa pasayishini bildirgan.
Agar Kanada bizning 51-shtatimizga aylansa, ularning soliqlari 60 foizdan ko‘proqqa kamayadi, bizneslari darhol ikki barobar o‘sadi va ular dunyodagi boshqa hech qaysi davlatda bo‘lmagan harbiy himoyaga ega bo‘ladi, deb yozgan Tramp Truth Social tarmog‘ida.
6-yanvar kuni Kanada bosh vaziri Jastin Tryudo liberallar partiyasi rahbari lavozimidan ketishini e’lon qildi. Tramp esa bunga ham munosabat bildirmay qolmadi. U Tryudoning bayonotidan so‘ng Kanadaga yana bir bor 51-shtat sifatida AQSH tarkibiga kirishni taklif qildi.
7-yanvar kuni Kanada hukumati Trampning taklifiga qat’iyan rad javobini berdi.
Saylangan prezident Trampning fikrlari Kanadani kuchli mamlakat qiladigan narsalarni mutlaqo tushunmasligini ko‘rsatmoqda. Iqtisodiyotimiz baquvvat. Xalqimiz matonatli. Biz hech qachon tahdidlar oldida orqaga chekinmaymiz, dedi Kanada tashqi ishlar vaziri Melani Joli.
Kanada bosh vaziri Jastin Tryudo ham mamlakat hech qachon AQSHning 51-shtatiga aylanmasligini ta’kidladi.
Kanadaning Qo‘shma Shtatlarning bir qismi bo‘lish ehtimoli yo‘q. Har ikki mamlakatdagi ishchilar va mahalliy jamoalar savdo va xavfsizlik sohasida bir-birlarining eng yirik hamkorlari ekanliklaridan foyda ko‘rmoqda, dedi iste’fosini e’lon qilgan Jastin Tryudo.
Izoh (0)