Meksikalik muhojirlarning yangi karvoni AQSH prezidenti Donald Trampning kutilayotgan qattiq migratsiya siyosatiga qaramasdan, AQSHga yo‘l oldi, deb xabar bermoqda CNN immigratsiya idoralariga tayanib.
Telekanal ma’lumotlariga ko‘ra, Venesuela, Kolumbiya, Ekvador, Kuba va boshqa davlatlarning, taxminan, 3 ming nafar fuqarosi joriy yilning 20-yanvar kechasi Meksikaning janubidagi Tapachula shahridan yo‘lga chiqdi.
Trampning qasamyod marosimi 20-yanvarda bo‘lib o‘tdi. Saylovoldi yig‘ilishlarida u millionlab noqonuniy muhojirlarni chiqarib yuborish bo‘yicha “Amerika tarixidagi eng yirik amaliyot”ni boshlashni, shuningdek, ayrim mamlakatlardan kelgan fuqarolarning kirish taqiqini qayta joriy etish va qochoqlarni qabul qilishni to‘xtatish orqali AQSH davlat chegarasini “muhrlash”ni va’da qildi.
Bundan tashqari, Tramp “Meksikada qol” dasturini qayta tiklashini aytdi, uning doirasida boshpana so‘rab murojaat qilganlar qo‘shni davlatdagi ishi bo‘yicha Amerika hukumatining qarorini kutishlari kerak edi.
Politsiya va xavfsizlik kuchlari Trampning inauguratsiyasidan so‘ng deyarli darhol AQSH va Meksika chegarasini yopishni boshladi. Tadbir davomida AQSHning yangi rahbari ikki davlat chegarasida favqulodda holat e’lon qilishini va noqonuniy migrantlarni ushlab turish uchun harbiylardan foydalanishini ma’lum qildi.
20-yanvar kuni AQSHning yangi ma’muriyati migrantlarga AQSHga qonuniy ravishda kirish imkonini beruvchi CBP One ilovasini yopdi — bu Amerikaga ko‘chib o‘tishni xohlovchilar uchun asosiy yo‘l. CNN nashrining yozishicha, bu tufayli Tramp jamoasiga allaqachon sud jarayoni tahdid solmoqda. Amerika fuqarolik erkinliklari ittifoqi boshpana berish bo‘yicha cheklovlar to‘g‘risidagi ish bo‘yicha ariza berdi.
AQSH prezidenti, shuningdek, migrantlarga nisbatan e’tirozi yo‘qligini aytdi.
“Men bunga qarshi emasman. Qonuniy migratsiyaga e’tirozim yo‘q. Bizga ishchi kuchi kerak. Men bunga yaxshi munosabatdaman. Migrantlarga ehtiyojimiz bor. Turli bojlardan qochish uchun AQSHga ko‘plab kompaniyalar keladi. Agar siz katta bojlarni to‘lashni xohlamasangiz, o‘zingizning zavodingizni AQSHda qurishingiz kerak. Shuning uchun bizning yurtga ko‘plab ishchilar keladi”, dedi Tramp.
Izoh (0)