AQSH prezidentlik saylovlarida g‘alaba qozongan Donald Tramp saylovoldi kampaniyasidagi ommaviy deportatsiya haqidagi va’dasini bajarishdan boshqa chorasi yo‘qligini ma’lum qildi.
“Bizda aslida tanlov yo‘q”, dedi Tramp NBC telekanaliga bergan intervyusida.
Tramp uchun immigratsiya siyosatini kuchaytirish saylov kampaniyasining asosiy nuqtalaridan biriga aylandi. U Jo Bayden ma’muriyatining “o‘ta yumshoq” siyosati Qo‘shma Shtatlarning uchinchi dunyo davlatiga aylanishiga olib kelganini bir necha bor ta’kidlagan. Tramp o‘z chiqishlarida migrantlarga nisbatan qattiqroq choralar ko‘rish va mavjud migratsiya dasturlarini qayta ko‘rib chiqish zarurligini aytgan.
Avvalroq Axios portali Tramp agar saylansa, hukumatning barcha darajadagi huquq-tartibot idoralari xodimlari yordamida millionlab noqonuniy muhojirlarni deportatsiya qilmoqchi ekanini xabar qilgan edi.
2016-yilgi saylovlarda AQSH prezidenti lavozimini egallagan Donald Tramp 5-noyabr kuni bo‘lib o‘tgan prezidentlik saylovlarida g‘alaba qozondi. U 19-asrdan beri to‘rt yillik tanaffusdan so‘ng Oq uyga qaytgan birinchi AQSH siyosatchisi bo‘ldi.
Demokratik nomzod Kamala Harris tarafdorlari bilan suhbatlashib, mag‘lubiyatini tan olishini e’lon qildi. AQSHning amaldagi prezidenti Jo Bayden esa Tramp bilan gaplashib, uni tabrikladi.
Izoh (0)