Kolumbiya prezidenti Gustavo Petro bortida deportatsiya qilinayotgan kolumbiyaliklar bo‘lgan AQSH samolyotlariga mamlakat hududiga qo‘nishni taqiqladi. AQSH prezidenti Donald Tramp bunga javoban Kolumbiyaga sanksiyalar kiritdi.
Ma’lum qilinishicha, Kolumbiya hukumati bortida taxminan 160 nafar kolumbiyalik migrant bo‘lgan ikkita AQSH harbiy samolyotini qabul qilishdan bosh tortgan. Deportatsiya uchun Kolumbiyaning roziligi talab qilinadi.
AQSH Kolumbiyadan kelgan muhojirlarga jinoyatchilar kabi munosabatda bo‘lmasligi kerak. Men Shimoliy Amerika samolyotlarining kolumbiyalik muhojirlar bilan bizning hududimizga kelishiga ruxsat bermayman. AQSH ularni qabul qilishimizdan oldin muhojirlarga munosib munosabatda bo‘lish qoidalarini joriy etishi lozim, degan Kolumbiya prezidenti Petro.
Kolumbiyaga qarshi sanksiyalar
Shundan so‘ng, Tramp Kolumbiyaning barcha tovarlariga 25 foizlik boj joriy etishini e’lon qildi va uni 50 foizgacha oshirish bilan tahdid qildi. U Kolumbiya amaldorlarining AQSHga kirishini taqiqladi, Kolumbiya hukumati a’zolari, ularning qarindoshlari va tarafdorlariga qarshi “viza sanksiyalari” joriy qildi.
Tramp Kolumbiyaning barcha fuqarolari uchun chegarada kuchaytirilgan tekshiruv boshlanishini va bu sanksiyalarning “faqat boshlanishi” ekanini aytdi.
Kolumbiyaning AQSHga javobi
Petro sanksiyalarga javoban Amerika tovarlariga ham xuddi shunday bojlarni joriy etishga qaror qildi. U Kolumbiya deportatsiya qilingan migrantlarni qabul qilishdan bosh tortmagani, muammo shundaki, migrantlar “qo‘lida kishan va harbiy samolyotda” yuborilganini aytdi.
Endilikda Kolumbiya hukumati AQSHdan deportatsiya qilingan fuqarolarini vataniga qaytarishda prezident samolyotidan foydalanadi.
Kolumbiya hukumati prezident Gustavo Petro rahbarligida bugun ertalab mamlakatga deportatsiya reyslarida kelishi kutilayotgan vatandoshlarning munosib tarzda qaytishini ta’minlash maqsadida prezident samolyotini ajratib berdi. Ushbu qaror hukumatning munosib sharoitlarni kafolatlash bo‘yicha zimmasiga olgan majburiyatiga javoban qabul qilindi, deyiladi prezident matbuot xizmati xabarida.
Migrantlarni qabul qilishga rozilik bergani sababli AQSH bojlar va sanksiyalarning bir qismini bekor qildi.
Meksika ham migrantlar bo‘lgan samolyotni qabul qilmayapti
Avvalroq AQSH Harbiy-havo kuchlarining ikki samolyotini (taxminan 160 kishi) Meksika qabul qilmagan. Shuningdek, deportatsiya qilinganlarni qabul qilishga rozilik bermagan. Muhojirlar bo‘lgan uchinchi samolyot umuman parvoz qilmagan. Bu parvozlar Trampning migrantlarga qarshi kurashish bo‘yicha keng qamrovli rejasining bir qismi hisoblanadi. Shu reja doirasida u allaqachon AQSH janubiy chegarasida favqulodda vaziyat rejimini joriy etgan va u yerga qo‘shimcha qo‘shin yuborishi mumkin.
Trampning migratsiya siyosati
Tramp 21-yanvar kuni chegaradagi barcha noqonuniy o‘tish joylari yopilishini ta’kidladi. U AQSH janubiy chegarasi orqali noqonuniy migrantlarning kirishini taqiqlash to‘g‘risidagi farmonni imzoladi. Boshpana izlash bahonasi bilan u yerda qolish huquqini chekladi.
Prezident Ichki xavfsizlik vazirligi, Adliya vazirligi va Davlat departamentiga AQSHga janubdan noqonuniy kirayotganlarni chiqarib yuborish choralarini ko‘rishni topshirdi. Pentagon chegaraga qo‘shimcha 1,5 ming askar va vertolyotlar yuborilishini e’lon qildi. Shuningdek, 5 mingdan ortiq noqonuniy migrantlarni deportatsiya qilish uchun aviatsiya taqdim etiladi, ularning oqimi va noqonuniy savdosini to‘xtatish uchun vaqtinchalik va doimiy to‘siqlar quriladi.
Meksika prezidenti AQSHga borish uchun uning mamlakatiga kelayotgan noqonuniy migrantlar o‘z vatanlariga qaytarib yuborilishini aytdi. Meksika AQSHdan noqonuniy migrantlarni olib kelayotgan harbiy transport samolyotini qabul qilishdan bosh tortdi.
Izoh (0)