Samarqand viloyatining Urgut tumanida maktab direktori va uning sherigi giyohvand modda sotgani maʼlum bo‘ldi. Ularga nisbatan jinoyat ishlari bo‘yicha tuman sudida o‘tkazilgan ochiq sud majlisida hukm o‘qilgan.
“Daryo” tanishga sud hukmiga ko‘ra, Urgut tumanidagi 71-umumtaʼlim maktabi direktori lavozimida ishlab kelgan 1986-yilda tug‘ilgan F.X. 2024-yilning avgust oyida mahalladoshi Sh.A. bilan ko‘p miqdordagi “opiy” giyohvand moddasini Samarqand viloyati hududida sotishga kelishgan.
Sud hukmida qayd etilishicha, Sh.A. tergovda shaxsini aniqlash imkoni bo‘lmagan shaxsdan qariyb 1 kg “opiy”ni pulini sotganidan so‘ng berish sharti bilan olgan.
2024-yil 27-noyabr kuni giyohvand moddani huquqni muhofaza qiluvchi organ xodimlari tomonidan tezkor tadbirga jalb qilingan shartli xaridorga 12 ming dollarga sotmoqchi bo‘lganda ushlangan.
Ulardan bir dona qora rangli sellofan paketga o‘ralgan “opiy” giyohvand moddasi ashyoviy dalil tariqasida olingan. Uning og‘irligi 921,36 grammni tashkil qilgan.
Sudda F.X. o‘z aybiga qisman iqrorlik bildirib, giyohvand moddani tuman Maktabgacha va maktab taʼlimi bo‘limida ishlovchi tanishining iltimosiga asosan topib berganligini, bundan manfaatdor bo‘lmaganini taʼkidlagan. Sh.A. ham aybiga qisman iqror bo‘lib, F.X. turmush o‘rtog‘ini ishga qabul qilishini aytgani uchun giyohvand modda topib berganini maʼlum qilgan.
Sud hukmi bilan F.X. va Sh.A. Jinoyat kodeksining 25,273-moddasi 5-qismida (giyohvandlik vositalari, ularning analoglari yoki psixotrop moddalarni ko‘p miqdorda qonunga xilof ravishda sotish) nazarda tutilgan jinoyatni sodir etganlikda aybli deb topilgan.
F.X.ga 10 yil 2 oy, Sh.A.ga 11 yil muddatga ozodlikdan mahrum qilish jazosi tayinlangan.
Giyohvand moddalar savdosi:
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)