Toshkent shahrida 15-yanvardan 15-fevralgacha “Xavfsiz va sog‘lom poytaxt” kompleks maxsus tezkor-profilaktik tadbirlar oyligi o‘tkazildi. Bu haqda poytaxt IIBB matbuot xizmati xabar berdi.
Maʼlum qilinishicha, oylik davomida tashkil etilgan maxsus guruhlar tomonidan jami 801 ta giyohvandlik vositalari, psixotrop moddalar va kuchli taʼsir qiluvchi vositalarning noqonuniy muomalasi bilan bog‘liq holatlar aniqlandi. Ular bo‘yicha 567 ta jinoyat ishi qo‘zg‘atildi, 158 ta maʼmuriy bayonnomalar rasmiylashtirildi, 76 ta holat bo‘yicha tergovga qadar tekshiruv harakatlari olib borilmoqda.
Ko‘rilgan tezkor chora-tadbirlar natijasida jami 21 kg 818 gr giyohvandlik vositalari, 28 790 ta kuchli taʼsir “Pregabalin” dori vositalari noqonuniy muomalasiga chek qo‘yildi va minglab insonlarning zaharlanishi oldi olinib, hayoti saqlanib qolindi.
Giyohvandlik vositalarini yashirish usuli orqali tarqatuvchilar bilan bog‘liq 34 ta holat aniqlanib, uning natijasida 9 kg 538 gr noqonuniy giyohvandlik moddalari hamda 3 689 dona kuchli taʼsir qiluvchi dori vositalarining noqonuniy muomalasi to‘xtatib qolindi.
O‘tkazilgan tezkor-qidiruv tadbirlari natijasida jami 160 nafar qidiruvdagi shaxslar ushlandi, 45 nafar bedarak yo‘qolganlar aniqlanib yaqinlariga qaytarildi. O‘tkir tig‘li buyumlarni qonunga xilof ravishda olib yurgan 2 181 nafar fuqarolar aniqlanib tegishli tartibda maʼmuriy bayonnomalar rasmiylashtirildi.
Tezkor tadbirlar davomida 1 ta jangovar (PM), 21 ta pnevmatik qurol va 7 ta o‘qotar ov miltig‘i hamda 14 dona o‘q-dorilar noqonuniy muomaladan olindi. Har bir holat yuzasidan jinoyat ishlari qo‘zg‘atilib, tergov harakatlari olib borilmoqda.
Olib borgan tadbirlar natijasida oldini olish mumkin bo‘lgan jinoyatchilik 43 foizga kamaydi. Shundan, firibgarlik 72 foizga, talonchilik 47 foizga, o‘g‘rilik 46,5 foizga kamayishiga erishildi.
So‘nggi vaqtlarda o‘tkazilayotgan tezkor tadbirlar
Avvalroq Farg‘ona viloyatida IIV ishchi guruhi tomonidan “Tozalash” kompleks tezkor-profilaktik tadbirlari o‘tkazilayotgani haqida xabar berilgandi. Jamoat tartibini saqlash, huquqbuzarliklar profilaktikasi hamda yo‘l harakati xavfsizligini taʼminlash yo‘nalishlarida reyd tadbirlari tashkil etilib, 8 nafar ov qurolini hujjatsiz noqonuniy saqlab kelayotgan, 27 nafar jamoat joyida tig‘li buyum olib yurgan shaxslarga nisbatan jinoiy va maʼmuriy choralar ko‘rilgan.
DXX hamda IIV tuzilmalari tomonidan 27—31-yanvar kunlari mamlakat miqyosida “Antiterror-tozalash” keng ko‘lamli tadbirlari o‘tkazilgandi. Kriminogen vaziyatni barqarorlashtirish va unga salbiy taʼsir ko‘rsatuvchi shaxs va jinoiy guruhlarni aniqlash maqsadida jami 946 ta maxsus tadbirlar o‘tkazilib, og‘ir va o‘ta og‘ir jinoyatlar sodir etishga moyil 418 kishi ushlangandi.
DXX hamda IIV tuzilmalari tomonidan 2025-yilning 3—4-fevral kunlari mamlakat miqyosida “Qoradori” keng ko‘lamli tadbirlarining dastlabki bosqichi olib borildi. Unda 112 kilodan ortiq giyohvandlik vositalari musodara qilindi.
Shuningdek, O‘zbekiston DXX hamda IIV tuzilmalari tomonidan joriy yilning 5—7-fevral kunlari mamlakat miqyosida “Oriyat” va “Qoradori” keng ko‘lamli tadbirlari o‘tkazilgandi.
Shu bilan birga, Farg‘onada 2,5 gektar yerni 650 ming dollarga sotmoqchi bo‘lgan shaxs ushlangan edi.
Izoh (0)