Farg‘ona tumanidagi uylarning birida narkolaboratoriya tashkil etilgani aniqlanib, jinoyat ishi qo‘zg‘atildi.
Tumandagi “Mindonobod” MFYdagi uylardan birida sintetik giyohvandlik vositalari tayyorlash maqsadida tashkil etilgan narkolaboratoriya DXXning Farg‘ona viloyati bo‘yicha boshqarmasi xodimlari tomonidan bojxona va ichki ishlar organlarini jalb qilgan holda o‘tkazilgan tezkor tadbirda fosh etilgan.
Aniqlanishicha, Marg‘ilon shahrida yashovchi, 1990 va 2001-yillarda tug‘ilgan 3 nafar shaxs mazkur xonadonni har oyiga 250 AQSH dollaridan ijaraga olib, u yerda giyohvandlik vositalari tayyorlash bilan shug‘ullangan.
Ko‘zdan kechirish davomida, ushbu manzildan 8 kilogramm 185 gramm Alfa-PVP, 4 kilogramm 209 gramm “Spays”, 427 gramm “Mefedron” sintetik narkotik moddalar hamda ularni tayyorlashda kerak bo‘ladigan 12 kilogramm 326 gramm maxsus suyuqlik va 13 kilogramm 925 gramm tamaki mahsulotlari ashyoviy dalil sifatida olingan.
Ekspertiza xulosasiga ko‘ra, tezkor tadbir davomida olingan jami 12 kilogramm 821 gramm sintetik narkotik moddalarning qora bozordagi bahosi 9 milliard 185 million so‘mni tashkil etadi.
Tergovga qadar tekshiruv davomida aniqlanishicha, qonunbuzarlar internet tarmog‘i orqali giyohvandlik vositalari sotish bilan shug‘ullanuvchi jinoiy guruh a’zolari tomonidan “zakladka” usulida yetkazib berilgan xom ashyo mahsulotlari asosida narkotik moddalar tayyorlab, viloyat bo‘yicha belgilangan xufiya joylarga qoldirib, ularning geolokatsiyasini jinoiy guruh a’zolariga yuborib turgan.
Buning evaziga uchala shaxsning har biri haftasiga kriptovalyuta ko‘rinishida 500 AQSH dollaridan maosh olgan.
Hozirda mazkur shaxslarga nisbatan Jinoyat kodeksining 273-moddasi (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) 4-qismi “b” bandi bilan jinoyat ishi qo‘zg‘atilib, qamoq ehtiyot chorasi qo‘llanildi.
Izoh (0)