Toshkent viloyati IIBB va boshqa huquqni muhofaza qiluvchi organlar hamkorligida viloyat hududida “Xavfsiz hudud” tezkor profilaktik tadbiri o‘tkazilmoqda. Bu haqda viloyat IIBB matbuot xizmati xabar berdi.
Maʼlum qilinishicha, giyohvandlik va psixotrop moddalar bilan bog‘liq jinoyatlarga qarshi kurash yo‘nalishda o‘tkazilgan tadbirlar natijasida 266 ta holat aniqlanib, jami 123,8 kg giyohvand va psixotrop moddalar noqonuniy muomaladan chiqarildi.
Xususan, Chinoz tumanida o‘tkazilgan tezkor tadbir davomida Qashqadaryo viloyatida yashovchi, 1993-yilda tug‘ilgan shaxs gashish giyohvandlik vositasini avtomashinada yashirincha olib ketayotgan vaqtida qo‘lga olindi.
Holat yuzasidan Jinoyat kodeksining 273-moddasi 5-qismi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) bilan jinoyat ishi qo‘zg‘atildi.
Shu kabi qidiruvdagi shaxslarni aniqlash yo‘nalish bo‘yicha sud va tergov organlaridan yashiringan hamda boshqa sabablarga ko‘ra qidiruvda bo‘lgan 168 nafar shaxs qo‘lga olindi.
Shulardan 6 nafari xorijiy davlatlardan ekstraditsiya qilindi. Bundan tashqari, 65 nafar bedarak yo‘qolgan shaxs topilib, oila aʼzolariga qaytarilishi taʼminlandi.
Odam savdosiga qarshi o‘tkazilgan tadbirlar davomida, ayol va qizlarni shahvoniy maqsadda O‘zbekiston tashqarisiga olib chiqmoqchi bo‘lgan 8 nafar shaxs daliliy ashyolar bilan ushlandi. Natijada 5 nafar ayol odam savdosi qurboniga aylanishining oldi olindi.
Xususan, 15-fevral kuni o‘tkazilgan tadbirda 2006-yilda tug‘ilgan qizni Turkiyaga noqonuniy ravishda olib chiqmoqchi bo‘lgan, Olmaliq shahrida yashovchi 1998-yilda tug‘ilgan ayol Toshkent xalqaro aeroportida qo‘lga olindi.
Holat yuzasidan Jinoyat kodeksining 135-moddasi (odam savdosi) bo‘yicha jinoyat ishi qo‘zg‘atildi.
Shuningdek, axloq va sog‘liqqa qarshi jinoyatlar bilan kurashish yo‘nalishida orttirilgan immun tanqisligi sindromi (OITS)ni tarqatish bilan bog‘liq 13 ta holat aniqlanib, ushbu shaxslarga nisbatan qonuniy huquqiy chora ko‘rilishi natijasida, ushbu shaxslarning boshqa fuqarolarga infeksiya yuqtirishining oldi olindi.
Shuningdek, tadbir davomida qo‘shmachilik qilish yoki fohishaxona saqlash bilan bog‘liq 85 ta, fohishalik bilan shug‘ullanish bo‘yicha esa 16 ta holat fosh etilib, barchasiga nisbatan tegishli tartibda qonun ustuvorligi taʼminlandi.
Shu kabi, uyushgan jinoyatchilikka qarshi kurash doirasida noqonuniy qurol saqlash, tovlamachilik va qimorxona tashkil qilish bilan bog‘liq 27 ta jinoiy holat aniqlandi.
Barcha gumonlanuvchilarga nisbatan qonunchilikka muvofiq choralar ko‘rildi.
Izoh (0)