Toshkent shahrida giyohvandlikning oldini olishga qaratilgan tezkor tadbirlar davomida ikki nafar shaxs to‘xtatilib, xolislar ishtirokida tekshirilganda ularning yonidan giyohvandlik moddalari topildi. Bu haqda poytaxt IIBB matbuot xizmati xabar berdi.
Jumladan, 18 dona kuchli taʼsir qiluvchi moddalar, 15 dona kapsula ko‘rinishidagi dori vositasi va 35 doni giyohvandlik vositalari rasmiylashtirib olindi. O‘tkazilgan ekspertiza xulosasiga ko‘ra, gumonlanuvchilardan olingan moddalarning barchasi giyohvandlik vositalar va kuchli taʼsir qiluvchi dorilar ekanligi maʼlum bo‘ldi.
“Manzildan borib tovarni oldik. Shayxontohur tumaniga tushdik, selofan paket ichidan gashish chiqdi. Biz u yerda berilgan narsani tarqatishimiz kerak edi. Qilgan ishimizdan uzr so‘rayman”, deydi gumonlanuvchilardan biri.
Holat yuzasidan Jinoyat kodeksining 273-moddasi 5-qismi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) bilan jinoyat ishi qo‘zg‘atilgan.
Gumonlanuvchilarga nisbatan qamoqqa olish tarzdagi ehtiyot chorasi qo‘llanilgan.
Tergov harakatlari davom etmoqda.
Giyohvand moddalar savdosi
2024-yilning mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)