Respublika bojxonachilari yil boshidan buyon 790 kg dan ziyod giyohvandlik vositalarining noqonuniy muomalasiga chek qo‘ydi. Bu haqda Bojxona qo‘mitasi matbuot xizmati xabar berdi.
Maʼlum qilinishicha, Chilonzor tumanida oldindan kuzatuvga olingan shaxs boshqaruvidagi avtomashina to‘xtatilib, belgilangan tartibda ko‘zdan kechirildi.
Natijada mashinadagi haydovchi va yo‘lovchining cho‘ntagidan polietilen o‘ramlarda jami 165 gramm og‘irlikdagi “opiy” giyohvandlik vositasi borligi aniqlandi.
Shuningdek, Yashnobod tumanidagi ofislardan birida 953 gramm og‘irlikdagi “gashish” va ularni o‘lchashda foydalanilgan elektron tarozi borligi aniqlandi.
Shu bilan birga, Surxondaryo viloyati, “Ayritom” chegara bojxona postida qo‘shni davlatdan kirib kelgan yuk mashinasini bojxona ko‘rigidan o‘tkazish davomida haydovchi avtotransport kabinasidagi orqa o‘rindiq ostida 37 gramm “gashish” giyohvandlik vositasini yashirib qo‘yganligi fosh bo‘ldi.
Maʼlumot uchun bojxonachilar yil boshidan buyon aniqlangan 108 ta qonunbuzilishi holatlarida 790 kg dan ziyod og‘irlikdagi giyohvand moddalarning olib kirilishi va ichki hududdagi aylanmasiga chek qo‘ygan.
Hozirda holatlar yuzasidan bojxona organlari tomonidan jinoyat ishlari qo‘zg‘atildi.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)