Andijon viloyatida “Tozalash“ kompleks tezkor-profilaktik tadbirlari o‘tkazildi. Bu haqda IIV matbuot xizmati xabar berdi.
Tadbirlar davomida qariyb 11 yil avval bosqinchilik jinoyatini sodir etgan shaxslarning jinoiy qilmishi fosh etildi. Shahrixon tumani, “Bayroq” tumanida yashovchi fuqaroning xonadoniga 2014-yil 21-may tunida ikki nafar niqobli shaxs pichoq va ov quroli bilan kirib, xonadon egasi va uning oilasiga hujum qilgan.
Nomaʼlum shaxslar pul talab qilgan. Uy egalariga kimgadir bu haqda murojaat qilgan taqdirda o‘ldirib ketish bilan tahdid qilgan. Uy egasining telefonini sindirib, nomaʼlum tomonga yashiringan.
Ushbu jinoyatni 1990 va 1993-yilda tug‘ilgan ikki nafar shaxs sodir etgani aniqlanib, ulardan biri qo‘lga olindi. Uning jinoiy sherigiga nisbatan esa qidiruv olib borilmoqda.
Jinoyatni sodir etishda foydalanilgan ov miltig‘i olinib, ashyoviy dalil sifatida rasmiylashtirildi.
Shuningdek, Xo‘jaobod tumanida 1984-yilda tug‘ilgan shaxs boshqaruvidagi Lacetti avtomashinasi to‘xtatib tekshirildi. Unda jami 2 kg gashish giyohvandlik vositasi borligi aniqlandi.
Bundan tashqari, yana bir holatda noqonuniy mayning fermasini tashkil etgan shaxs aniqlandi. Uning xonadonidagi mayning qurilmalar va sovitish ombori tuman elektr tarmoqlari korxonasi bilan shartnoma tuzmasdan, noqonuniy ravishda tarmoqqa ulanib faoliyat yuritib kelgan.
Buning oqibatida 1,2 mlrd so‘mlik zarar yetkazilgan.
So‘nggi vaqtlarda o‘tkazilayotgan tezkor tadbirlar
Avvalroq Farg‘ona viloyatida IIV ishchi guruhi tomonidan “Tozalash” kompleks tezkor-profilaktik tadbirlari o‘tkazilayotgani haqida xabar berilgandi. Jamoat tartibini saqlash, huquqbuzarliklar profilaktikasi hamda yo‘l harakati xavfsizligini taʼminlash yo‘nalishlarida reyd tadbirlari tashkil etilib, 8 nafar ov qurolini hujjatsiz noqonuniy saqlab kelayotgan, 27 nafar jamoat joyida tig‘li buyum olib yurgan shaxslarga nisbatan jinoiy va maʼmuriy choralar ko‘rilgan.
DXX hamda IIV tuzilmalari tomonidan 27—31-yanvar kunlari mamlakat miqyosida “Antiterror-tozalash” keng ko‘lamli tadbirlari o‘tkazilgandi. Kriminogen vaziyatni barqarorlashtirish va unga salbiy taʼsir ko‘rsatuvchi shaxs va jinoiy guruhlarni aniqlash maqsadida jami 946 ta maxsus tadbirlar o‘tkazilib, og‘ir va o‘ta og‘ir jinoyatlar sodir etishga moyil 418 kishi ushlangandi.
DXX hamda IIV tuzilmalari tomonidan 2025-yilning 3—4-fevral kunlari mamlakat miqyosida “Qoradori” keng ko‘lamli tadbirlarining dastlabki bosqichi olib borildi. Unda 112 kilodan ortiq giyohvandlik vositalari musodara qilindi.
Shuningdek, O‘zbekiston DXX hamda IIV tuzilmalari tomonidan joriy yilning 5—7-fevral kunlari mamlakat miqyosida “Oriyat” va “Qoradori” keng ko‘lamli tadbirlari o‘tkazilgandi.
Shu bilan birga, Farg‘onada 2,5 gektar yerni 650 ming dollarga sotmoqchi bo‘lgan shaxs ushlangan edi.
Izoh (0)