Besh yil ichida mamlakatda narkotik moddalarni noqonuniy sotishga doir jinoyatlar soni ikki baravarga ko‘paydi. Bu haqda Oliy sud eʼlon qilgan hisobotda yozilgan.
2024-yilda Jinoyat kodeksining 270, 271, 273-276-moddalariga daxldor jinoyatlar sodir etganlikda ayblanib, 8 373 kishi sudlangan. Mazkur moddalar asosida sudlov giyohvandlik bilan bog‘liq jinoyat sodir etganlikni anglatadi.
Tahlillarga qaraganda, 2020-yilda ushbu turdagi jinoyatga qo‘l urganlar 3 941 nafar, 2021-yilda 4 182 nafar, 2022-yilda 5 825 nafar bo‘lgan. 2023-yilda bunday qilmishni sodir etganlar soni yanada oshib, 6 204 nafarga yetgan. O‘tgan yili esa bunday jinoyat ko‘chasiga kirganlar 2169 nafarga yoki 35 foizga ko‘paygan.
Hududlar kesimida giyohvandlik bilan bog‘liq jinoyatlarning eng ko‘p ulushi Toshkent shahrida qayd etib kelinmoqda. Jumladan, poytaxtda 2022-yilda 1218 shaxs, 2023-yilda 1309 shaxs, 2024-yilda 1999 shaxs mazkur jinoyatni sodir etgan. Shu bilan birga, o‘tgan yili Farg‘ona (1410 nafar) va Toshkent (1219 nafar) viloyatlarida ushbu turdagi qonunga xilof harakatga qo‘l urganlar soni nisbatan ko‘p bo‘lgan.
Umuman olganda, o‘tgan yil davomida narkotik moddalar muomalasi bilan bog‘liq jinoyatlar ulushi boshqa jinoyatlarga qaraganda ko‘proq o‘sgan. Undan keyingi o‘rinni o‘g‘irlik sodir etganlar egallagan. Bunday jinoyat sodir etganlar soni 2023-yilda 7 319 nafar bo‘lsa, 2024-yilda 8 321 nafarni tashkil etgan.
Hisobotga ko‘ra, 2024-yili O‘zbekistondagi sudlarda 61 481 ta jinoiy ish ko‘rib chiqildi, oxirgi besh yillikdagi eng ko‘p — 77 995 kishi sudlandi. Ular sodir etgan jinoyatlarning ijtimoiy xavflilik darajasi turlicha. Masalan, qariyb 22 951 kishi (29 foiz) og‘ir, 4 144 kishi (5 foiz) o‘ta og‘ir jinoyat sodir etgan.
Avvalroq O‘zbekistonning qaysi hududida eng ko‘p jinoyat sodir etilayotgani ochiqlangandi.
Izoh (0)