Farzand asrab olishdek ezgu ishni amalga oshirgan mashhurlar o‘zlarining shov-shuvli ismi ortida insoniylik va mehrga to‘la qalblari borligini isbotlaydi. Aksariyat oilalar asrab olgan bolalarini o‘z farzandlaridek tarbiyalaydi. Taniqli yulduzlar asrab olgan go‘daklarning hayotini yaxshilashni maqsad qiladi va ular ham boshqa bolalar kabi ota-ona mehrining taftida yashashga haqli ekanini ta’kidlaydi.
Sandra Bullok
Jessi Jeymsga turmushga chiqqan Sandra doim bola asrab olishni orzu qilgan, ammo u o‘z niyatiga yetishiga ulgurmay, turmushidan ajraldi. So‘ng “Oskar” sovrindori 2010-yilda nyu orleanlik Lui ismli bolani o‘z qaramog‘iga olib, birinchi marta onalik baxtiga muyassar bo‘ldi. Keyinchalik u Leyla ismli qizni asrab olib, oilasini kengaytirdi. Bullok bir necha bor EKU usuli orqali farzandli bo‘lishga harakat qilgan, ammo urinishlar besamar bo‘lgan.
Sharliz Teron
Yulduz hozirda ikki farzand tarbiyasi bilan band. 2012-yilda aktrisa Jekson ismli bolani, 2015-yilda esa Janubiy Afrikadagi mehribonlik uyidan Ogast ismli qizni olib ketgan.
“Men asrab olingan bolani parvarishlash va o‘z biologik farzandimni tarbiyalash o‘rtasida hech qanday farqni ko‘rmayman”, deydi Teron.
Anjelina Joli va Bred Pitt
Juftlikning olti nafar farzandi bor, ulardan uchtasini asrab olishgan. Anjelina 2002-yilda kambojalik Meddoksni, 2005-yilda efiopiyalik Zaxarani o‘z qaramog‘iga oldi. Shundan keyin juftlik 2007-yilda vyetnamlik Paks Tyen ismli bolani asrab oldi. Juftlikning Shaylo ismli qizi, Noks Leon va Vivyen Marshelin ismli egizaklari ham bor.
Joli va Pitt bir necha bor ularning oilasi sevgi, madaniyatlar xilma-xilligi va har bir avlodning ildizlariga hurmatga asoslanganini ta’kidlagan. Biroq aktyorlar ajrimidan so‘ng uzoq yillar davomida oilada keskin munosabatlar hukm surdi: sobiq turmush o‘rtoqlar yillar davomida sudlashib keldi, Bredning qizlari esa otasining familiyasidan voz kechdi.
Sheron Stoun
2000-yilda Sheron Stoun va uning sobiq turmush o‘rtog‘i Fil Bronshteynlar Roan ismli bolani oilasiga qabul qildi. Ajrimdan to‘rt yil o‘tgach, aktrisa yana farzand asrab olishga qaror qildi. So‘ng u Lerd va Kuinn ismli bolalarni vasiyligiga oldi.
Madonna
Pop qirolichasi Madonna malavilik to‘rt nafar bolani asrab olgan. U o‘g‘li Devid Banda Mvaleni 2006-yilda, uch yildan keyin esa qizi Chikundo Mersi Jeymsni asrab olgan. Madonna 2017-yilda egizaklari Stella va Esterning vasiyligini oldi. Shuningdek, xonandaning aktyor Karlos Leondan Lourdes ismli qizi va rejissyor Gay Richi bilan turmushidan Rokko Jon ismli o‘g‘li bor.
Foto: People
Jeymi Li Kertis
Jeymi Li Kertis va uning turmush o‘rtog‘i Kristofer Gest ikki nafar qizlarni — Rubi va Enni ismli bolalarni tarbiya qilib kelmoqda.
Nikol Kidman va Tom Kruz
Sobiq juftlik ikki nafar farzandni: 1993-yilda Izabella Jeyn va 2005-yilda Konnor Entonini asrab olgan. Tom va Nikol 2001-yilda ajrashgandan so‘ng, aktrisa musiqachi Keyt Urbanga turmushga chiqdi. Ushbu nikohda Sandey va Feyt ismli ikki qiz dunyoga keldi. Kruzning esa Keti Holms bilan turmushidan Suri ismli farzandi bor.
Izoh (0)