Davlat xavfsizlik xizmatining IIV va Bojxona qo‘mitasi xodimlari bilan hamkorligida o‘tkazgan tezkor tadbirda qariyb 100 kilogramm giyohvandlik vositalari olib qo‘yildi.
DXXning Surxondaryo viloyati bo‘yicha boshqarmasi xodimlari tomonidan ichki ishlar organlari bilan hamkorlikda o‘tkazilgan tezkor tadbirda Sariosiyo tumanida yashovchi, 1977-yilda tug‘ilgan, muqaddam sudlangan shaxs tojikistonlik narkokuryerlar tomonidan Uzun tumani hududidagi xufiya joyga qoldirib ketilgan 82 kilogramm 478 gramm opiy moddasini olib, mahalliy fermer xo‘jaliklaridan birining noturar binosiga yashirib qo‘ymoqchi bo‘lgan vaqtida ushlandi.
Aniqlanishicha, u 2 ming dollar xizmat haqi evaziga, tojikistonlik narkosavdogarning ko‘rsatmasiga asosan ushbu giyohvandlik vositasini kelgusida belgilangan joyga yetkazib berishi kerak bo‘lgan.
DXX va IIV xodimlari hamkorligida Namangan viloyatining Kosonsoy tumanida o‘tkazilgan tezkor tadbirda, 2001-yilda tug‘ilgan shaxs sintetik giyohvandlik vositalarini “zakladka” tarzida joylashtirayotgan vaqtida qo‘lga olingan.
Shuningdek, u o‘z qaynanasining yashash xonadonida narkolaboratoriya tashkil qilgani aniqlanib, tintuv-tergov harakatlari davomida ushbu manzildan 9 kilogramm 450 gramm “Mefedron” sintetik giyohvandlik vositasi ashyoviy dalil sifatida olingan.
Bundan tashqari, mazkur fuqaro tomonidan mijozlarga sotish maqsadida xufiya joylarga qoldirilgan jami 595 gramm “Mefedron” moddasi ham tegishli tartibda rasmiylashtirib olingan.
Boshqa holatda esa Rossiyadan xalqaro pochta jo‘natmalari orqali boshqa tovar nomi ostida plastik idishda yuborilgan 7 kilogramm 313 gramm sintetik kannabinoid analogi bo‘lgan “5-Fluro-ADB” giyohvand moddasini qabul qilib olganlarida Toshkent shahrida vaqtincha yashovchi, 2001 va 2002-yillarda Qashqadaryo viloyatida tug‘ilgan ikki nafar shaxs DXX va Bojxona qo‘mitasi xodimlari tomonidan qo‘lga olingan.
Aniqlanishicha, ular WhatsApp orqali tanishgan nomaʼlum profil egasi topshirig‘iga ko‘ra, 500 dollar evaziga ushbu ajal og‘usini Toshkent shahridan Samarqand viloyatiga yetkazib berishi kerak bo‘lgan. Shundan so‘ng, tezkor tadbir davom ettirilib, mazkur narkotik moddani Samarqand viloyatida qabul qilib olgan vaqtlarida Past Darg‘om tumanida yashovchi, 2001 va 2002-yillarda tug‘ilgan ikki nafar fuqaro ham ushlangan.
Ulardan birining Samarqand shahridagi xonadoni ko‘zdan kechirilganda sintetik giyohvandlik vositalarini tayyorlash uchun mo‘ljallangan yashirin laboratoriya tashkil qilingani maʼlum bo‘ldi.
Hozirda barcha holatlar yuzasidan mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, qamoq ehtiyot chorasi qo‘llandi. Tergov harakatlari olib borilmoqda.
25-fevral kuni O‘zbekistonga Tojikiston va Qirg‘izistondan kontrabanda yo‘li bilan olib kelingan 48 kilodan ortiq narkotik moddalar musodara qilingandi. Xususan, Surxondaryoda narkotik moddalar savdosi bilan shug‘ullangan ota va uning ikki o‘g‘li qo‘lga tushgan.
Izoh (0)