Indoneziyaning Sragen shahrida 360 dan ortiq kishida bepul maktab tushligini iste’mol qilgach, oziq-ovqatdan zaharlanish qayd etildi. Ushbu bepul oziq-ovqat dasturi mamlakat prezidenti Prabovo Subianto tomonidan o‘zining saylovoldi kompaniyasi doirasida ishga tushirilgan edi. Bu haqda The Guardian xabar berdi.
Bu holat prezident joriy etgan bepul ovqat dasturi boshlanganidan buyon qayd etilgan eng yirik zaharlanish ekani aytilmoqda. Rasmiy ma’lumotlarga ko‘ra, umumiy hisobda 365 nafar fuqaro kasallangan, oziq-ovqat namunasi esa laboratoriya tekshiruvi uchun yuborilgan. Hukumat, zarur bo‘lsa, davolanish xarajatlarini qoplashini ma’lum qilgan.
Maktab o‘quvchilardan biri qorin og‘rig‘i, bosh og‘rig‘i va diareya bilan uyg‘ongan. U ijtimoiy tarmoqlarda sinfdoshlari ham shikoyat qilayotganini ko‘rgach, zaharlanishdan gumon qilgan. Aytilishicha, zaharlanishga sabab bo‘lgan taom sariq guruch, tuxumli omlet, qovurilgan tempe (soya loviyasi), bodring, salat bargi, kesilgan olma hamda sut bo‘lgan. Ovqat markaziy oshxonada tayyorlanib, bir nechta maktablarga tarqatilgan.
Sragen meri Sigit Pamungkas ushbu oshxonadan vaqtincha taom tarqatishni to‘xtatish buyurilganini ma’lum qilmoqda. Bepul oziq-ovqat dasturi tatbiq etilganidan beri butun mamlakat bo‘ylab 1 mingdan ortiq odam turli zaharlanish holatlaridan aziyat chekkan. May oyida G‘arbiy Yavada 200 dan ortiq o‘quvchi zaharlanib, laboratoriya ovqatda Salmonella bakteriyalarini aniqlagan edi.
Prabovoning milliardlab dollarlik oziq-ovqat dasturi saylovoldi kampaniyasining asosiy qismi bo‘lib, uning maqsadi fuqarolar hayot sifatini oshirish va iqtisodiy o‘sishni tezlashtirishdir. Hozirgacha 15 milliondan ortiq odam ushbu dasturdan foydalangan, yil oxirigacha bu ko‘rsatkichni 83 millionga yetkazish rejalashtirilgan. Dastur uchun bu yil 171 trillion rupiya (10,62 mlrd dollar) ajratilgan.
Izoh (0)