Xonanda Shahriyor narkotik modda bilan qo‘lga olingani rad etildi

IIV axborot xizmati rahbari Shohrux G‘iyosov xonanda Shahriyor narkotik modda bilan qo‘lga olingani haqidagi xabarlarni rad etdi.

Toshkent shahar IIBB YHXB “Sharq” YPX maskanida fuqaroning yonidan giyohvandlik moddasi topilgani haqida xabar bergandi. 25-fevral kuni YPX xodimlari tomonidan Onix rusumli transport vositasi to‘xtatilib haydovchi bilan suhbat jarayonida avtomashinada yo‘lovchi sifatida kelayotgan shaxs o‘zining harakatlari bilan xodimlarda shubha uyg‘otgan.

Xolislar ishtirokida ushbu shaxs tekshirilganda kiyimlari orasiga yashirib olgan giyohvandlik moddasi aniqlangan va tegishli tartibda Bektemir tumani IIO FMBga olib borib topshirilgan.

“Bu xabarni ayrim ommaviy axborot vositalari gumonlanuvchi shaxs aynan xonanda Shahriyor ekanini yozib tarqatishmoqda. Ushbu axborot haqiqatdan yiroqligini ma’lum qilamiz”, deydi Shohrux G‘iyosov.

IIV axborot xizmati rahbari bu kabi xabar tarqatish aybsizlik prezumpsiyasi talablarini, shuningdek, shaxsga doir ma’lumotlar to‘g‘risidagi qonunning 14-moddasi hamda Ommaviy axborot vositalari to‘g‘risidagi qonunning 6-moddasini qo‘pol ravishda buzish hisoblanishini bildirib, OAV va jamoatchilikni surishtiruv va tergovga oid axborotni tarqatishlarida qonunchilik talablariga qat’iy rioya qilishga chaqirdi.