Senatning Mudofaa va xavfsizlik masalalari qo‘mitasi ishchi guruhining yig‘ilishida mutasaddi vazirlik va idoralar vakillari tomonidan Jinoyat kodeksining 266-moddasiga (transport vositalari harakati yoki ulardan foydalanish xavfsizligi qoidalarini buzish) o‘zgartirish va qo‘shimchalar kiritish yuzasidan takliflar muhokama qilindi. Bu haqda Senat matbuot xizmati xabar berdi.
Taʼkidlanishicha, ushbu moddada nazarda tutilgan qilmish ehtiyotsizlik oqibatidagi jinoyat sifatida eʼtirof etilsa-da, oxirgi vaqtlarda bu turdagi qilmishlar yo‘l harakatining boshqa ishtirokchilari, ayniqsa piyodalar, velosiped haydovchilarini huquqlarini ochiq mensimaslik, ayniqsa muqaddam yo‘l harakati qoidalarini buzganligi yoki YTH sodir etganligi uchun transport vositasini boshqarish huquqidan mahrum qilinganlar, shuningdek, mastlik holatida yoki giyohvandlik vositalari, ularning analoglari, psixotrop yoxud kishining aql-idrokiga taʼsir qiluvchi boshqa moddalar taʼsiri ostida bo‘lgan shaxslar tomonidan sodir etilayotganligi kuzatilmoqda.
Xususan, 2020–2024-yillar davomida mast haydovchilar sababli 600 ga yaqin YTH oqibatida davrda 322 nafar fuqaro halok bo‘lgan. 2024-yilning o‘zida transport vositasini boshqarish huquqidan mahrum etilgan shaxslar tomonidan ro‘yxatga olingan 405 ta YTH sabab 94 nafar fuqaro vafot etgan.
Senatning Mudofaa va xavfsizlik masalalari qo‘mitasi tomonidan mutasaddi vazirlik va idoralardan olingan fikrlar asosida Jinoyat kodeksining 266-moddasiga o‘zgartirish va qo‘shimchalar kiritish orqali yo‘l harakati qoidalarini qo‘pol buzgan haydovchilarga nisbatan jinoyatning og‘irligini hisobga olgan holda jazo choralarini kuchaytirish bo‘yicha takliflar ishlab chiqildi.
Ushbu moddada belgilangan huquqbuzarlikni transport vositasini boshqarish huquqidan mahrum qilingan shaxs yoxud mastlik holatida yoki giyohvandlik vositalari, ularning analoglari, psixotrop yoxud kishining aql-idrokiga taʼsir qiluvchi boshqa moddalar taʼsiri ostida bo‘lgan shaxs tomonidan sodir etilganda og‘irroq jazo choralarini qo‘llashni nazarda tutuvchi tegishli qonun loyihasini tayyorlash uchun masʼul vazirlik va idoralar vakillaridan iborat tarkibda ishchi guruhni shakllantirish masalasi ko‘rib chiqildi.
Sodir bo‘layotgan YTHlar
2024-yil 5-dekabr kuni Toshkent shahrining Mirzo Ulug‘bek va Yunusobod tumanlarida 1,5 soat ichida YTHlar sodir bo‘lgani haqida xabar berilgandi. Shuningdek, 6-dekabr kuni Yunusobod va Yashnobod tumanlarida YTHlar sodir bo‘lgandi.
3-noyabr tunda poytaxtning uchta tumanida YTH sodir bo‘ldi. Sergelida Spark va Matiz to‘qnashdi, Yunusobodda Lacetti yo‘l chetidagi beton ustunga borib urildi, Mirzo Ulug‘bek tumanida Lacetti va BMW to‘qnashdi.
11-noyabr kuni Mirobod tumanidagi Sanʼat muzeyi qarshisida Lacetti King Long avtobusi orqasiga borib urildi. 16-noyabrda Yakkasaroy tumanida Malibu yo‘l chetidagi temir ustunga urildi va haydovchi hamda yo‘lovchisi jarohat oldi.
17-noyabr kuni Yunusobod tumanida Toyota, Malibu-2 va Cobalt avtomashinalari ishtirokida YTH sodir bo‘ldi. 24-noyabr kuni Mirzo Ulug‘bek tumanida Spark va Epica to‘qnashib, yonib ketdi. Hodisa oqibatida halok bo‘lganlar yo‘q.
Mirzo Ulug‘bek tumanida 28-noyabr kuni soat 16:10 larda 5 ta avtomashina ishtirokida YTH sodir bo‘ldi.
Avvalroq O‘zbekistonda avtomobilni takroran mast holda boshqarganlik uchun jinoiy javobgarlik belgilanayotgani haqida xabar berilgandi.
Izoh (0)