Toshkent viloyatining Qibray tumani “Ahillik” mahallasi hududida “zakladchik”lar bilan bog‘liq holat fosh etildi. Bu haqda viloyat IIBB matbuot xizmati xabar berdi.
Xodimlar xizmat vaqtida shubhali harakat qilgan 22 yoshlar atrofidagi ikki nafar shaxsni kuzatgan. Kuzatuv davomida xodimlardan qochishga uringan 2003-yilda tug‘ilgan (M.A. va J.M.)lar ushlanib, xolislar ishtirokida ko‘zdan kechirilgan.
Natijada ularning yonidan 520 dona qadoqlangan holatdagi kuchli taʼsir qiluvchi, psixofaol dori vositalari borligi aniqlanib, IIB tezkor xodimi ishtirokida daliliy ashyo sifatida rasmiylashtirildi.
Aniqlanishicha ushbu shaxslar mazkur vositalarni hududning xufiyona joylarida “zakladka” ko‘rinishida yashirish maqsadida olib kelgan.
Hozirda holat yuzasidan tergovga qadar tekshiruv harakatlari olib borilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)