Farg‘ona viloyatida huquqni muhofaza qilish organlari tomonidan “Tozalash” kompleks tezkor-profilaktik tadbirlari o‘tkazildi. Bu haqda IIV matbuot xizmati xabar berdi.
Maʼlum qilinishicha, viloyat hududida olib borilgan faol tadbirlar doirasida 86 ta jinoiy, 853 ta maʼmuriy, jami 939 ta holat aniqlandi. 98 nafar shaxs jinoiy javobgarlikka tortilgan bo‘lsa, 889 nafar shaxsga nisbatan maʼmuriy choralar ko‘rildi. 49 ta jinoyat fosh etilib, 31 nafar qidiruvdagi shaxs ushlandi. 1 167 nafar shaxs rasmiy ogohlantirildi.
Qo‘lga olingan jinoiy guruh va shaxslardan 3 kg 376 gr giyohvandlik vositalari, 2 331 dona kuchli taʼsir qiluvchi dori vositalari, 17 ta noqonuniy qurol, 344 dona tig‘li buyumlar olinib, ashyoviy dalil sifatida rasmiylashtirildi.
Olib borilgan tadbirlar davomida Rishton tumanida yashovchi 1995-yilda tug‘ilgan shaxs qo‘lga olindi.
U erkaklar kiyim do‘koniga kirib, sotib olmoqchi bo‘lgan mahsulotlarini nasiyaga berishni talab qilgan. Sotuvchi bunga ko‘nmagach, uni shaʼni va qadr-qimmatini kamsituvchi so‘zlar bilan haqoratlab, qo‘l-oyoqlari bilan urib do‘pposlagan.
Oqibatda do‘kon sotuvchisi jarohatlangan. Holat yuzasidan Jinoyat kodeksining 277-moddasi 3-qismi “a” bandi (bezorilik takroran yoki xavfli retsidivist tomonidan) bilan jinoyat ishi qo‘zg‘atilib, gumonlanuvchiga nisbatan qamoqqa olish tarzida ehtiyot chorasi qo‘llandi.
Farg‘ona tumanida o‘tkazilgan “nazorat ostida olish” tadbiri davomida esa maxsus xaridorga 2,3 ming dollar evaziga 500 gramm giyohvandlik moddasini sotayotgan shaxs qo‘lga olindi.
Uning yashash xonadonida keyinchalik sotish maqsadida saqlab kelinayotgan giyohvandlik moddasi olinib, kimyoviy ekspertizaning xulosasiga ko‘ra, sof og‘irligi 1 kg 470 gramm marixuana giyohvandlik vositasi ekanligi aniqlandi.
Oltiariq tumanida olib borilgan tezkor tadbir davomida noqonuniy elektr energiyasidan foydalanish holatiga chek qo‘yildi. “Qo‘rg‘oncha” mahallasi hududida joylashgan bog‘dorchilik fermer xo‘jaligi tarmoqqa ulanib, elektr energiyasidan noqonuniy foydalangan holda davlatga 1 mlrd 897 mln 533 ming 734 so‘m miqdorda zarar yetkazgani aniqlanib, tegishli hujjatlar rasmiylashtirildi.
Yer resurslarini talon-toroj qilish holatlarining oldini olish yuzasidan Uchko‘prik tumanida o‘tkazilgan tezkor tadbir davomida 1968-yilda tug‘ilgan shaxs qo‘lga olindi.
U “Kenagas” mahallasi hududida joylashgan 90 sotix qismi noturar va 1 gektar 60 sotixi davlat zaxirasida bo‘lgan jami 2,5 gektar yer maydonini 650 ming dollarga sotishga kelishib, oldindan 100 ming dollarni olgan vaqtida ashyoviy dalillar bilan ushlandi.
Aniqlangan holatlar bo‘yicha jinoyat ishlari qo‘zg‘atilib, tergov harakatlari olib borilmoqda.
So‘nggi vaqtlarda o‘tkazilayotgan tezkor tadbirlar
Avvalroq Farg‘ona viloyatida IIV ishchi guruhi tomonidan “Tozalash” kompleks tezkor-profilaktik tadbirlari o‘tkazilayotgani haqida xabar berilgandi. Jamoat tartibini saqlash, huquqbuzarliklar profilaktikasi hamda yo‘l harakati xavfsizligini taʼminlash yo‘nalishlarida reyd tadbirlari tashkil etilib, 8 nafar ov qurolini hujjatsiz noqonuniy saqlab kelayotgan, 27 nafar jamoat joyida tig‘li buyum olib yurgan shaxslarga nisbatan jinoiy va maʼmuriy choralar ko‘rilgan.
DXX hamda IIV tuzilmalari tomonidan 27—31-yanvar kunlari mamlakat miqyosida “Antiterror-tozalash” keng ko‘lamli tadbirlari o‘tkazilgandi. Kriminogen vaziyatni barqarorlashtirish va unga salbiy taʼsir ko‘rsatuvchi shaxs va jinoiy guruhlarni aniqlash maqsadida jami 946 ta maxsus tadbirlar o‘tkazilib, og‘ir va o‘ta og‘ir jinoyatlar sodir etishga moyil 418 kishi ushlangandi.
DXX hamda IIV tuzilmalari tomonidan 2025-yilning 3—4-fevral kunlari mamlakat miqyosida “Qoradori” keng ko‘lamli tadbirlarining dastlabki bosqichi olib borildi. Unda 112 kilodan ortiq giyohvandlik vositalari musodara qilindi.
Shuningdek, O‘zbekiston DXX hamda IIV tuzilmalari tomonidan joriy yilning 5—7-fevral kunlari mamlakat miqyosida “Oriyat” va “Qoradori” keng ko‘lamli tadbirlari o‘tkazilgandi.
Izoh (0)