O‘zbekiston BMT Xavfsizlik kengashining 2035—2036-yillarda doimiy bo‘lmagan aʼzoligiga o‘z nomzodini ilgari surdi, deb xabar bermoqda “Dunyo” axborot agentligi.
Keltirilishicha, O‘zbekistonning BMTdagi doimiy vakili, elchi Ulug‘bek Lapasov Xitoy raisligida BMT Xavfsizlik kengashining ko‘p tomonlama va global boshqaruv institutlarini isloh qilish masalalariga bag‘ishlangan yig‘ilishida maʼruza bilan ishtirok etdi.
Unda O‘zbekistonning BMT bilan o‘zaro hamkorlikning eng ustuvor masalalari bo‘yicha rasmiy pozitsiyasi xalqaro hamjamiyatga yetkazildi. O‘zbekistonning ko‘p qirrali, global boshqaruvni mustahkamlash va takomillashtirish tarafdori ekani taʼkidlandi. Shuningdek, mintaqaviy hamkorlik muhimligi va Afg‘onistonni iqtisodiy tiklashdan manfaatdor ekani qayd etildi.
Mamlakat transmilliy tahdidlarga, jumladan, giyohvandlik moddalarning noqonuniy aylanishi, terrorizm va uyushgan jinoyatchilikka qarshi kurashda BMT bilan hamkorlikni yanada kengaytirishga tayyorligi tasdiqlandi.
Ishtirokchilarga iqtisodiy barqarorlikni taʼminlash, kambag‘allikni qisqartirish va yoshlar imkoniyatlarini kengaytirishga qaratilgan “O‘zbekiston-2030” strategiyasining mazmun-mohiyati va ahamiyati xususida so‘zlab berildi. O‘zbekistonda 2025-yil – “Atrof-muhitni muhofaza qilish va ”yashil iqtisodiyot“ yili”, deb eʼlon qilingani qayd etildi.
Qayd etilishicha, Orol fojiasi oqibatlarini yumshatish maqsadida o‘rmonlar barpo etish, suvni tejash, qayta tiklanadigan energiya manbalaridan foydalanish borasida keng ko‘lamli ishlar amalga oshirilayotgani maʼlum qilindi. Shuningdek, Orolbo‘yida barqaror rivojlanishni xalqaro qo‘llab-quvvatlashni kengaytirish zarurligi taʼkidlandi.
Aʼzo davlatlar 2025-yil iyun oyida Samarqand shahrida bo‘lib o‘tadigan BMTning “Besh yil – 2030-yilgacha: Barqaror kelajak uchun davlat xizmatlarini ko‘rsatishni jadallashtirish” mavzusidagi davlat xizmatlari forumiga taklif qilindi.
O‘zbekistonning global tinchlik va xavfsizlikni taʼminlash tarafdori ekanligiga urg‘u berildi. Shu nuqtayi nazardan, mamlakat BMT Xavfsizlik kengashining 2035—2036-yillar uchun doimiy bo‘lmagan aʼzoligiga o‘z nomzodini ilgari surgani maʼlum qilindi.
Ma’lumot uchun, BMT Xavfsizlik kengashi — dunyoning eng muhim organlaridan biri bo‘lib, u global tinchlik va xavfsizlikni ta’minlashda, shuningdek, favqulodda holatlarda qarorlar qabul qilishda markaziy rol o‘ynaydi.
Izoh (0)