Toshkent viloyati IIBB va uning quyi tizim xodimlari tomonidan giyohvandlik hamda kuchli taʼsir qiluvchi psixotrop va sintetik dori vositalarining aylanmasiga qarshi kurashish borasida nazorat-reyd tadbirlari o‘tkazilmoqda.
Xususan, kuni kecha IIBB Giyohvandlik va psixotrop moddalarining noqonuniy muomalasiga qarshi kurashish bo‘limi hamda O‘rta Chirchiq tumani IIB xodimlari tomonidan o‘tkazilgan tezkor-qidiruv tadbirlari natijasida, viloyat hududida giyohvandlik vositalarini maʼlum joylarga yashirib ketish orqali tarqatib kelgan (“zakladchik”) 19 yoshli fuqaro A.O. (kollej talabasi) daliliy ashyo bilan ushlangan.
Tadbir davomida ushbu shaxs tomonidan joylarga yashirilgan jami 25 dona kichik o‘ramlarda qadoqlangan “mefedron” sintetik giyohvandlik vositalari xolislar ishtirokida hujjatlashtirilib olingan.
Hozirda holat yuzasidan Jinoyat kodeksi 273-moddasi 5 qismi bilan jinoyat ishi qo‘zg‘atilib, qo‘shimcha surishtiruv va tergov harakatlari olib borilmoqda.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)