Britaniyadagi aeroportda samolyotlar to‘qnashishi sabab parvozlar vaqtincha bekor qilindi (video)

Buyuk Britaniyaning Manchester aeroportida 15-avgust kuni ertalab 2 ta EasyJet samolyoti to‘qnashib, qanotlari tirnalishi sababli barcha parvozlar qisqa muddatga to‘xtatildi. Bu haqda The Guardian xabar berdi.

Ma’lum qilinishicha, hodisa samolyotlar uchish yo‘lagiga kirayotganda sodir bo‘lgan. Parij va Gibraltar yo‘nalishidagi samolyotlar mahalliy vaqt bilan taxminan soat 06:30 da bir-biriga tegib ketgan. Hodisada EZY2267 (Manchester—Gibraltar) va EZY2117 (Manchester—Parij Charles de Gaulle) reyslari o‘zaro to‘qnashgan. Bortdagi yo‘lovchilarning hech qaysisiga jarohat yetmagani xabar qilinmoqda. 

Aeroport vakillaridan biri hodisa vaqtida parvozlar qisqa muddatga to‘xtatilganini, samolyotlar tekshirilgach, aeroport faoliyati bir necha daqiqadan so‘ng qayta tiklanganini ma’lum qilgan. Gibraltarga uchayotgan samolyot yo‘lovchisi Tynisha Chaudhry to‘qnashuvni “avtomobil to‘qnashuviga o‘xshash” deb ta’riflab, butun samolyot titrab ketganini bildirgan. EasyJet kompaniyasi hodisa yuzasidan tezkor tekshiruv boshlanganini ta’kidlamoqda.