Самарқанд вилоятининг Ургут туманида мактаб директори ва унинг шериги гиёҳванд модда сотгани маълум бўлди. Уларга нисбатан жиноят ишлари бўйича туман судида ўтказилган очиқ суд мажлисида ҳукм ўқилган.
“Дарё” танишга суд ҳукмига кўра, Ургут туманидаги 71-умумтаълим мактаби директори лавозимида ишлаб келган 1986 йилда туғилган Ф.Х. 2024 йилнинг август ойида маҳалладоши Ш.А. билан кўп миқдордаги “опий” гиёҳванд моддасини Самарқанд вилояти ҳудудида сотишга келишган.
Суд ҳукмида қайд этилишича, Ш.А. терговда шахсини аниқлаш имкони бўлмаган шахсдан қарийб 1 кг “опий”ни пулини сотганидан сўнг бериш шарти билан олган.
2024 йил 27 ноябрь куни гиёҳванд моддани ҳуқуқни муҳофаза қилувчи орган ходимлари томонидан тезкор тадбирга жалб қилинган шартли харидорга 12 минг долларга сотмоқчи бўлганда ушланган.
Улардан бир дона қора рангли целлофан пакетга ўралган “опий” гиёҳванд моддаси ашёвий далил тариқасида олинган. Унинг оғирлиги 921,36 граммни ташкил қилган.
Судда Ф.Х. ўз айбига қисман иқрорлик билдириб, гиёҳванд моддани туман Мактабгача ва мактаб таълими бўлимида ишловчи танишининг илтимосига асосан топиб берганлигини, бундан манфаатдор бўлмаганини таъкидлаган. Ш.А. ҳам айбига қисман иқрор бўлиб, Ф.Х. турмуш ўртоғини ишга қабул қилишини айтгани учун гиёҳванд модда топиб берганини маълум қилган.
Суд ҳукми билан Ф.Х. ва Ш.А. Жиноят кодексининг 25,273-моддаси 5-қисмида (гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотиш) назарда тутилган жиноятни содир этганликда айбли деб топилган.
Ф.Х.га 10 йил 2 ой, Ш.А.га 11 йил муддатга озодликдан маҳрум қилиш жазоси тайинланган.
Гиёҳванд моддалар савдоси:
Март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек—қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)