Samarqand shahridagi tungi klublarining birida opiy giyohvandlik moddasini sotishga uringan shaxslar qo‘lga olindi. Bu haqda Samarqand viloyati IIB axborot xizmati xabar berdi.
Olingan tezkor maʼlumotlarga asosan, Samarqand viloyati IIB Uyushgan jinoyatchilikka qarshi kurash bo‘limi xodimlari, DXX viloyat boshqarmasi hamda harbiy qism chegara qo‘shinlari tezkor bo‘linmasi xodimlari hamkorligida Samarqand shahridagi tungi klublarning birida tezkor tadbir o‘tkazilgan.
Tadbir davomida 36 hamda 33 yoshli Urgut tumani fuqarolari tadbirga jalb qilingan shaxsga 10 ming dollar evaziga taxminan og‘irligi 810 gramm opiy giyohvandlik moddasini sotayotgan vaqtida daliliy ashyolar bilan ushlangan. Ularga tegishli bo‘lgan avtomashina ko‘zdan kechirilganda 1 dona elektron tarozi borligi ham aniqlangan va tegishli tartibda hujjatlashtirib olingan.
Holat bo‘yicha Samarqand viloyat IIB huzuridagi Tergov bo‘limi tomonidan ushbu fuqarolarga nisbatan jinoyat ishi qo‘zg‘atilib, ular tegishli tartibda qamoqqa olingan.
Avvalroq DXX Buxoroda giyohvand moddani 2,5 ming dollarga sotishga uringan Afg‘oniston fuqarosini ushlagani, Toshkent shahri va viloyatida kuchli ta’sir qiluvchi dorilar savdosi bilan shug‘ullangan 9 kishi qo‘lga olingani, DXX Namangan, Toshkent va Sirdaryoda giyohvandlik moddalari savdosiga chek qo‘ygani to‘g‘risida xabar berilgandi.
Izoh (0)