Farg‘ona viloyatida IIV ishchi guruhi tomonidan “Tozalash” kompleks tezkor-profilaktik tadbirlari o‘tkazilmoqda. Bu haqda IIV Tezkor-qidiruv departamenti xabar berdi.
Jamoat tartibini saqlash, huquqbuzarliklar profilaktikasi hamda yo‘l harakati xavfsizligini taʼminlash yo‘nalishlarida reyd tadbirlari tashkil etilib, 8 nafar ov qurolini hujjatsiz noqonuniy saqlab kelayotgan, 27 nafar jamoat joyida tig‘li buyum olib yurgan shaxslarga nisbatan jinoiy va maʼmuriy choralar ko‘rildi.
Avtoreyd tadbirlarida 1321 nafar qoidabuzar haydovchilar aniqlanib, 131 ta transport vositalari jarima maydonchasiga joylashtirildi.
Shuningdek, “Tozalash” tadbirlari doirasida Farg‘ona shahrida 1986 hamda 1988-yilda tug‘ilgan ikki nafar shaxs qo‘lga olindi. Ular o‘zaro jinoiy til biriktirib, tovlamachilik yo‘li bilan 1987-yildan tug‘ilgan fuqaroning sir saqlanishi lozim bo‘lgan shaxsga doir maʼlumotlarni ruxsatsiz qo‘lga kiritib, tarqatish bilan qo‘rqitib kelgan.
Shu maqsadda undan 2,5 ming dollar talab qilib, oldindan 1,5 ming dollarni olgan vaqtida ushlandi.
Buvayda tumanida esa 1991-yilda tug‘ilgan shaxs 2022-yilda diniy taʼlimotdan saboq berish tartibini buzganligi uchun sudlangan bo‘lishiga qaramasdan 1996-yilda tug‘ilgan turmush o‘rtog‘i bilan birgalikda yashash xonadonining yerto‘la qismida 30 nafar shaxslarga hujra sharoitida diniy saboq berib kelganligi aniqlandi.
Yerto‘lada taʼlim olayotganlarning 23 nafari voyaga yetmaganlar bo‘lib, ular orasida nafaqat Farg‘ona viloyati, balki Sirdaryo, Namangan, Surxondaryo viloyatlaridan ota-onalari tomonidan olib kelinganlari ham bor.
“Ko‘mir taʼminot” MCHJ Farg‘ona viloyati filiali So‘x ko‘mir ombori 2024-yil davomida 10,7 tonna arzonlashtirilgan ko‘mir mahsulotlarini yetkazib bergan.
So‘x ko‘mir ombori mudiri va mansabdor shaxslari tomonidan yuk xati hujjatlarini soxtalashtirish orqali chiqim hujjatlariga nisbatan 10,7 tonna ko‘mir mahsulotlaridan 8,7 ming tonnasini o‘rnatilgan tartibda aholi hamda ijtimoiy soha obyektlari ehtiyojlari uchun yetkazib berilib, 2 ming tonna qiymati 780 mln so‘mlik “BR” markali ko‘mir mahsulotlari chiqim hujjatlariga qo‘shib yozish orqali o‘zlashtirib, talon-toroj qilingan.
DXX hamda IIV tuzilmalari tomonidan 27—31-yanvar kunlari mamlakat miqyosida “Antiterror-tozalash” keng ko‘lamli tadbirlari o‘tkazilgandi. Kriminogen vaziyatni barqarorlashtirish va unga salbiy taʼsir ko‘rsatuvchi shaxs va jinoiy guruhlarni aniqlash maqsadida jami 946 ta maxsus tadbirlar o‘tkazilib, og‘ir va o‘ta og‘ir jinoyatlar sodir etishga moyil 418 kishi ushlangandi.
DXX hamda IIV tuzilmalari tomonidan 2025-yilning 3—4-fevral kunlari mamlakat miqyosida “Qoradori” keng ko‘lamli tadbirlarining dastlabki bosqichi olib borildi. Unda 112 kilodan ortiq giyohvandlik vositalari musodara qilindi.
Shuningdek, O‘zbekiston DXX hamda IIV tuzilmalari tomonidan joriy yilning 5—7-fevral kunlari mamlakat miqyosida “Oriyat” va “Qoradori” keng ko‘lamli tadbirlari o‘tkazilgandi.
Izoh (0)