O‘zbekistonga Tojikiston va Qirg‘izistondan kontrabanda yo‘li bilan olib kelingan 48 kilodan ortiq narkotik moddalar musodara qilindi.
Davlat xavfsizlik xizmatining Surxondaryo viloyati bo‘yicha boshqarmasi va viloyat ichki ishlar boshqarmasi xodimlari hamkorligida o‘tkazilgan tezkor tadbirda Denov tumanida istiqomat qiluvchi, muqaddam giyohvandlik vositalari savdosi bilan bog‘liq jinoyati uchun sudlangan 1984-yilda tug‘ilgan shaxs Tojikistondan aylanma yo‘llar orqali narkotik moddalarni olib kelib, sotish bilan shug‘ullanayotgan holati aniqlanib, uning yashash xonadoni ko‘zdan kechirilgan.
Natijada xonadon yerto‘lasidan 576 gramm geroin, 2 kilogramm 447 gramm opiy va 1 kilogramm 913 gramm gashish moddalari protsessual tartibda rasmiylashtirib olingan.
Shuningdek, uning muqaddam giyohvandlik vositalari savdosi bilan bog‘liq jinoyati uchun sudlangan, 1956-yilda tug‘ilgan otasidan 9 kilogramm 62 gramm gashish moddasi hamda kelib chiqishi noaniq bo‘lgan 137 460 dollar va 569 million 832 ming so‘m olingan.
Bundan tashqari, tezkor tadbir davom ettirilib, uning muqaddam giyohvandlik vositalari savdosi bilan bog‘liq jinoyati uchun sudlangan, 1980-yilda tug‘ilgan akasi va Uzun tumanida istiqomat qiluvchi, 1987-yilda tug‘ilgan jinoiy sherigi ham qo‘lga olinib, jinoiy sherigining uyidan ham kelib chiqishi noaniq bo‘lgan 159 400 dollar olingan.
DXX Chegara qo‘shinlari va Namangan viloyati bo‘yicha boshqarmasi hamkorligida Yangiqo‘rg‘on tumanida o‘tkazilgan tezkor tadbirda Yangiqo‘rg‘on—Namangan yo‘nalishida harakatlanayotgan avtobus to‘xtatilib, ko‘zdan kechirilganda yo‘lovchi sifatida ketayotgan, mazkur tumanda yashovchi 1999 va 2002-yillarda tug‘ilgan ikki nafar fuqaro sumkalarida jami 19 kilogramm 915 gramm gashish moddasi borligi aniqlanib, tegishli tartibda rasmiylashtirib olingan.
Tergovga qadar tekshiruv davomida, ular giyohvandlik vositasini kelgusida sotish maqsadida Qirg‘izistondan kontrabanda yo‘li bilan olib kelgani aniqlangan.
Andijon viloyatida kuzatilgan holatda esa Marhamat tumanida yashovchi, 1996-yilda tug‘ilgan, muqaddam sudlangan shaxs o‘zbek-qirg‘iz davlat chegarasining mazkur tuman hududidan o‘tuvchi qismiga kelib, avvalroq Qirg‘iziston fuqarosi tomonidan kontrabanda yo‘li bilan o‘tkazib berilgan 4 kilogramm 931 gramm opiy va 9 kilogramm 949 gramm gashish moddalarini olib, qaytayotgan vaqtida Chegara qo‘shinlari harbiy xizmatchilari tomonidan ushlangan.
Hozirda mazkur shaxslarga nisbatan Jinoyat kodeksining 246 (kontrabanda) va 273-moddalari (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) bilan jinoyat ishlari qo‘zg‘atilib, tergov harakatlari olib borilmoqda.
Fevral oyi boshlarida Surxondaryoda 13,5 tonna supurgi orasiga giyohvand vositasini yashirib olib kirishga urinish fosh etilgandi. Dastlabki hisob-kitoblarga ko‘ra, mazkur giyohvandlik vositasining qora bozorlardagi narxi taxminan 16,5 million dollardan oshadi. Hozirda holat yuzasidan tergovga qadar tekshiruv harakatlari davom ettirilmoqda.
O‘zbekistonda to‘xatib qolingan yirik miqdordagi giyohvandlik vositalari
1992−1994-yillarda qo‘mitaning Surxondaryo viloyati boshqarmasi tomonidan qariyb 15,5 tonnadan ortiq giyohvandlik vositalari to‘xtatib qolingan. 1992-yil 8-oktabrda mayiz ortilgan konteyner ichida 13 tonnadan ortiq gashish yashirilgani aniqlangan. Ushbu giyohvandlik vositalarining qora bozordagi narxi o‘sha vaqtlarda 1,3 milliard dollarni tashkil qilgan.
1993-yil 16-fevralida esa yong‘oq ortilgan 2 ta temiryo‘l konteynerda 1167 kilogramm gashish yashirilgani fosh qilingan. Shu yili Surxondaryoda avtorefrijeratorning tom qismiga yashirilgan 1,2 tonna geroinning olib o‘tilishining oldi olingan.
O‘zbekistonda so‘nggi besh yilda narkologik hisobga olingan 14 yoshdan 30 yoshgacha bo‘lgan giyohvandlik vositalari isteʼmolchilari 60 foizga ko‘paygan.
Izoh (0)