Toshkentda giyohvand moddalar savdosi bilan shug‘ullangan talabalar ushlandi

DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlandi, deb xabar beradi O‘zA.

Qayd etilishicha, davlat chegarasining Yangiqo‘rg‘on tumani hududidan o‘tuvchi qismida nomaʼlum shaxslar tomonidan qoldirib ketilgan 14 kilogramm 512 gramm gashish moddasi borligi aniqlanib, protsessual tartibda rasmiylashtirib olingan.

Hozirda holat yuzasidan DXX Namangan viloyati bo‘yicha boshqarmasi tomonidan Jinoyat kodeksining 246-moddasi (Kontrabanda) bilan jinoyat ishi qo‘zg‘atilib, ushbu giyohvandlik vositalari egalarining shaxsiga aniqlik kiritish bo‘yicha zarur chora-tadbirlar amalga oshirilmoqda.

DXX Toshkent shahar bo‘yicha boshqarmasi xodimlari tomonidan boshqa huquq-tartibot idoralari bilan hamkorlikda o‘tkazilgan tezkor tadbirda esa Namangan—Toshkent yo‘nalishida harakatlanayotgan Lacetti rusumli avtomashina Ohangaron tumani hududida to‘xtatilgan.

Avtomashina ko‘zdan kechirilganda, unda yo‘lovchi sifatida ketayotgan, Farg‘ona viloyatida tug‘ilgan 21 yoshli fuqaroga tegishli qo‘l sumkasi ichida 50 gramm geroin moddasi, 672 dona “Regapen” va 300 dona “Tropikamid” kuchli taʼsir qiluvchi dori vositalari borligi aniqlanib, protsessual tartibda rasmiylashtirib olindi.

Tezkor tadbir davom ettirilib, Qirg‘iziston fuqarosi tomonidan Yangiqo‘rg‘on tumani hududiga kontrabanda yo‘li bilan o‘tkazilgan ushbu giyohvandlik vositalarini 1,8 ming dollarga sotib olgan Buxoro viloyatida tug‘ilgan 27 yoshli  shaxs ham Ohangaron tumanidagi “Chinor” YPX maskanida ushlangan.

Taʼkidlanishicha, mazkur shaxslarning biri Toshkent shahridagi davlat, ikkinchisi esa nodavlat universitetlarning talabalari hisoblanib, ular poytaxt hududida narkotik moddalar savdosi bilan shug‘ullanishgan.

Hozirda ushbu fuqarolarga nisbatan DXX Toshkent shahar bo‘yicha boshqarmasi tomonidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.