Ўтган ҳафта НАТОнинг ёпиқ кечки зиёфатида Европа раҳбарлари АҚШ президенти Дональд Трампни Россияга нисбатан қатъийроқ позиция эгаллашга чақирди. Бу ҳақда Чехия президенти Петр Павел CNN Prima NEW’ъга берган суҳбатида маълум қилди.
“Биз у билан жуда изчил тарзда гаплашдик, Россияга иқтисодий босимни сезиларли даражада кучайтириш вақти келганига уни ишонтиришга ҳаракат қилдик”, деди Павел.
Президентнинг айтишича, босимдан мақсад Россияни иқтисодий жиҳатдан барбод қилиш эмас, балки Москвани Украина бўйича музокараларга қайтишга мажбур қиладиган шароит яратишдир.
“У ҳозирча эҳтиёткор, аммо бу жуда самарали восита эканлигини тушуниб турибди”, дея қўшимча қилди Чехия раҳбари.
Петр Павелнинг таъкидлашича, Трамп кечки зиёфат пайтида Хитойга нисбатан қаттиқ савдо сиёсатини эслатиб ўтган ва айнан юқори божлар Пекин позициясини ўзгартирганини қайд этган.
“Айнан шундай қатъий ёндашув ҳозир ҳам зарур. Агар Хитой таъсирни бир ой ичида ҳис қилган бўлса, Россия ўз иқтисодиёти билан бир ёки икки ҳафта ичида ҳис қилади”, деди Павел.
Сиёсатчининг сўзларига кўра, АҚШ президенти Дональд Трамп Европа нима учун ҳарбий харажатларни кескин ошира олмаётганидан ҳайратда эканини ҳам билдирган.
“У нима учун Европа келгуси йилдаёқ мудофаага ялпи ички маҳсулотнинг 5 фоизини сарф қила олмаслигидан ҳайрон бўлди. Иттифоқчилар тушунтиришича, Европа саноати ҳозирда бундай ҳажмдаги қурол-яроқларни ишлаб чиқаришга жисмонан тайёр эмас”, деди Петр Павел.
Изоҳ (0)