НАТО аъзолари Гаагадаги саммитда 2035 йилга бориб мудофаа харажатларини 5 фоизгача оширишга келишиб олди. Саммитда 2019 йилдан бери энди иштирок этаётган АҚШ президенти Дональд Трамп бу қарорни “катта ғалаба” деб атади.
АҚШ президенти Гаагадаги НАТО саммитида қабул қилинган қарорни “Европа ва Ғарб цивилизацияси учун катта ғалаба” деб таърифлади. Қўшма баёнотда альянс аъзолари “хавфсизликка чуқур таҳдидлар, жумладан, Россия таҳдиди ва терроризм”га қарши бирлашганини эълон қилган.
Етакчилар альянснинг бир аъзосига ҳужум қилинган тақдирда, НАТОнинг барча аъзолари бунга тегишли жавоб қайтаришини яна бир бор таъкидлаб ўтган.
“Хавфсизлигимиз хавф остида қолса, ҳеч ким салоҳият ва қатъиятимизга шубҳа қилмасин. Эндиликда альянс янада кучли, адолатли иттифоққа айланиб бормоқда”, деди НАТО бош котиби Марк Рютте.
Гаага саммити бир қатор етакчилар томонидан тарихий деб таърифланмоқда. Рютте 25 июнь куни қабул қилинган қарорлар тинчликка интилиш билан бирга, Украинани қўллаб-қувватлашни давом эттиришини билдирган.
Келишувга кўра, альянсга аъзо давлатлар келаси 10 йил давомида мудофаа харажатларини 5 фоизгача оширади. 2035 йилга бориб ҳар бир аъзо давлат ялпи ички маҳсулотининг камида 3,5 фоизини асосий мудофаа харажатларига, шунингдек, хавфсизлик инфратузилмасига тегишли инвестицияларга эса энг кўпи билан 1,5 фоизини йўналтиради.
АҚШ президенти 2019 йилдан бери биринчи марта НАТО саммитида иштирок этмоқда. У харажатларнинг ошиши “барча учун катта ғалаба” бўлишини айтган. Трамп саммит доирасида Украина президенти Владимир Зеленский билан ҳам музокаралар ўтказган. Матбуот анжуманида Трамп Украинада ўт очишни тўхтатишга эришиш у кутганидан “қийинроқ” бўлаётганини таъкидлаган. Шунингдек, Украинага қўшимча ҳаво ҳужумидан мудофаа тизимларини етказиб бериш таклифини ҳам ўртага ташланган.
Саммит сўнгида НАТОга аъзо давлатлар Украинани қўллаб-қувватлаш мажбуриятини олганини таъкидлаб, Киевнинг мудофааси ва мудофаа саноатига ёрдам берилишини ҳам қўшимча қилган.
Изоҳ (0)