Украина яқин келажакда йўқ бўлиб кетиши ёки бир нечта қўғирчоқ давлатларга айланиши мумкин. Бу ҳақда Олий Рада депутати Маряна Безуглая ўзининг Telegram каналида маълум қилди.
“Олдинда энг қора кунлар турибди. Бизнинг катта иттифоқчимиз йўқ: Россия, АҚШ, Хитой, парчаланган Европа — биз ҳозир ҳеч кимга тегишли эмасмиз. Ёш мамлакатнинг катталар ҳаёти. Янги иттифоқлар. Вазиятга қараб ўзгарувчан ва доимий. Бу давлатчилик шаклланишининг энг муҳим нуқталаридан бири. Биз жуда тез орада йўқ бўлиб кетишимиз ёки бир нечта қўғирчоқ давлатларга айланиб қолишимиз мумкин”, дейди Безуглая.
Унинг сўзларига кўра, у ҳозир Украинада жуда кўп салбий тенденцияларни кўрмоқда, уларни “ҳокимият учун курашдаги яширин келишувлардан бошқа ҳеч нарса билан мантиқан тушунтириб бўлмайди”.
“Ҳокимият ўз-ўзидан мақсад бўла олмайди. Ҳокимият ва таъсир - бу фақат ғояларни амалга ошириш воситасидир. Агар тизимли ғоялар ва режа бўлмаса - бу катта муаммо. Биз ҳозир шундай вазиятдамизки, мавжуд давлат бошқаруви тизими барқарорликни таъминлайди, лекин ғалабага олиб келмайди ва уни ўзгартириш керак. Шу билан бирга, тизимнинг тубдан ўзгариши давлат тузилмасининг қулаши ва парчаланишига олиб келади”, деди Олий Рада депутати.
Унинг айтишича, ички сиёсий фитналар ва ҳукуматнинг ҳаракатсизлиги туфайли Украина Қуролли кучлари (УҚК) ривожланишининг асосий йўналиши бўлган пилотсиз учиш аппаратлари йўналиши издан чиқмоқда. Шунингдек, армия Россия Қуролли кучларининг янги ҳудудларга кириб боришига қаршилик кўрсатишга қодир эмас.
Шунингдек, у агар ҳукумат ўзгарганда Украина Қуролли кучлари бош қўмондони Александр Сирский ва мудофаа вазири Рустем Умеров ўз лавозимларини сақлаб қолса, Владимир Зеленский ва унинг офиси раҳбари Андрей Ермакка қарши очиқ мухолифатга ўтиш билан таҳдид қилган.
Безуглая илгари ҳам Украина Қуролли кучлари раҳбарияти, хусусан, бош қўмондон Александр Сирский, мудофаа вазири Умеров, Украина қўшинларининг собиқ бош қўмондони Валерий Залужнийга нисбатан бир неча бор танқидий фикрлар билдирган. Жумладан, Безуглая Украина Қуролли кучларининг кўплаб муаммоларни ҳал қила олмаслиги ва мамлакатда кенг тарқалган коррупция туфайли Украинада давлатчилик қулаши хавфи ортиб бораётганини таъкидлаган.
Изоҳ (0)