АҚШ президенти Дональд Трамп Украинада ўт очишни тўхтатиш “тез орада” ёки “ҳеч қачон” ўрнатилмаслигини айтди. Бу ҳақда Deutsche Welle хабар берди.
Трамп музокаралар бўйича аллақачон “катта ютуқларга” эришилганини билдирди. Россия президенти Владимир Путинга ишониш мумкинми, деган саволга у “ишон, лекин текшир” дея жавоб берди. Шу билан бирга АҚШ президенти агар тинчлик шартномаси тузилса, “Путин уни бузиб, Украинага яна бостириб киради деб ўйламаслигини” таъкидлади.
Шунингдек, Трампдан Европа тинчликпарвар кучларининг Украинага юборилиши НАТО шартномасининг 5-моддасини кучга киришига олиб келишидан хавотирда эмасмисиз, деб сўрашди. Бу модда бўйича альянснинг барча давлатлари ҳужумга учраган аъзога ёрдам бериши шарт.
Менимча, бизда бунга сабаб бўлмайди, дея таъкидлади АҚШ президенти.
У ушбу моддада кўрсатилган НАТО вазифасини қўллаб-қувватлашини қайд этди. Трамп Украинадаги эҳтимолий тинчликпарварлик миссияси тафсилотлари ҳақида гаплашишдан бош тортди. Аввало Москва ва Киев ўртасида тинчлик битими тузилишига эришмоқчи эканини таъкидлади.
Кир Стармер: Буюк Британия Украинага қўшин юборишга тайёр
Британия бош вазири 27 февраль куни АҚШ президенти билан қўшма матбуот анжуманида Лондон иттифоқчилар билан биргаликда Украинада қуруқликдаги қўшинлар ва авиацияни жойлаштиришга тайёрлигини тасдиқлади. У буни “мустаҳкам тинчликни таъминлашнинг ягона йўли” деб атади.
Кир Стармернинг сўзларига кўра, у Трамп билан Украина ҳал қилувчи рол ўйнайдиган ва ҳарбий куч билан қўллаб-қувватланадиган “қаттиқ, аммо адолатли келишув” ҳақида суҳбатлашган.
Бу келишув Путиннинг кўпроқ нарсани талаб қилишни истамаслигини таъминлаш учун мўлжалланган, деб хабар бермоқда DPA агентлиги.
Бу босқинчини мукофотлайдиган тинчлик бўлмаслиги керак. Тарих босқинчи томонида эмас, тинчликпарвар томонида бўлиши лозим, дея таъкидлади Стармер.
Акс ҳолда, унинг фикрича, янги “Эрон режимига ўхшаш режимлар” пайдо бўлиш хавфи туғилади. Стармер Европанинг 18 давлати вакиллари Украина учун тинчлик шартномасини муҳокама қилиш мақсадида йиғилмоқчи эканини айтди.
Изоҳ (0)