Россия Украинадаги урушни 2026 йилгача якунлашни режалаштирмоқда, акс ҳолда ҳеч қачон АҚШ ва Хитой даражасига ета олмайди. Бу ҳақда Украина Бош разведка бошқармаси бошлиғи ўринбосари Вадим Скибицкий маълум қилди.
Скибицкийнинг сўзларига кўра, Россия 2045 йилгача эҳтимолий ҳарбий можароларнинг 15 та сценарийсини прогноз қилган. Улардан олтитаси шимолий Европа билан боғлиқ.
Шимолий Европа ва Болтиқбўйи давлатлари вазиятни тушунмоқда. Польша ҳам тушунмоқда. Польша учун эҳтимолий ҳарбий тўқнашувнинг тўртта сценарийси мавжуд. Польша ҳозир бунинг бевосита таҳдид эканини англаб етмоқда, деди Украина разведкаси вакили.
У Москвада 2026–2035 йилларга мўлжалланган геосиёсий прогноз ишлаб чиқилиб, унинг 2045 йилгача бўлган оқибатлари баҳоланганини айтди. Ҳужжатларда “Украина масаласи” 2026 йилгача ҳал этилиши лозимлиги кўрсатилгани айтилмоқда.
Чунки агар уруш яна 5-10 йил давом этадиган бўлса, Россия ҳеч қачон АҚШ ва Хитой даражасига етиб ололмайди ва улар билан тенглаша олмайди, дея қўшимча қилди Скибицкий.
У Европа хавфсизлик тизимини ташкил этишнинг янги ёндашувларида Украинанинг роли муҳим эканини қўшимча қилди.
Россиянинг бошқа давлатларга эҳтимолий ҳужуми: мавзуга оид янгиликлар
НАТО доираларидаги манбаларга кўра, Россия Финляндия ва НАТОнинг шарқий қанотидаги бошқа давлатларга ҳужум қилиш режасини ишлаб чиққан. Гап Россия армиясининг бир нечта бўлинмаларининг бир вақтнинг ўзида ҳужуми ҳақида кетмоқда. Унга ўн минглаб аскар жалб қилиниши эҳтимоли борлиги айтилган.
Financial Times нашрига кўра, Россия Япония ва Жанубий Корея билан эҳтимолий уруш учун нишонларнинг батафсил рўйхатини тузган. Рўйхатга 160 та ҳарбий ва фуқаролик инфратузилмаси объектлари — атом электр станциялари, кўприклар, заводлар ва қўмондонлик пунктлари киритилган. 2008–2014 йиллардаги махфий ҳужжатлар Х-101 ракеталари билан зарбалар беришни ва Япония ҳамда Жанубий Кореянинг ҳаво мудофаасини текширишни тасвирлайди.
Европа дипломатияси раҳбари Кая Каллас Россия 2028 йилдаёқ Европа иттифоқига ҳужум қилиши мумкинлигини айтиб, Европани мудофаа харажатларини оширишга чақирган. НАТО билан уруш 4-6 йилдан кейин бўлиши мумкинлиги таъкидланган.
Изоҳ (0)