“Ан-Насср” клуби ҳужумчиси, португалиялик юлдуз Криштиану Роналду Саудия Арабистонига ташриф буюришни тавсия қилди. 40 ёшли футболчи яқинда клуб билан шартномасини 2027 йилгача узайтирган эди.
Роналду мамлакатдаги ҳаётдан мамнунлигини билдириб, Саудия Арабистонида ўзини хотиржам ҳис қилаётганини таъкидлади:
Одамларни бу ерга келишга кўндириш шарт эмас. Шунчаки, “келиб кўринглар!” дейиш кифоя. Масалан, ҳозир мен Қизил денгиз бўйидаман — бу ер менга ва оиламга ёқади, ўзимни хотиржам ҳис қиламан. Саудия Арабистонида ҳаёт тинч, шаҳарлар чиройли. Бу жой менга жуда маъқул, маданияти ҳам ўзига хос. Кўп нарса ўзгарганини кўриб турибман, — дея Роналду сўзларини келтиради “Ан-Насср” клуби матбуот хизмати.
Роналду Саудия Арабистонининг “Ан-Насср” клубига 2023 йил январь ойида келиб қўшилган эди. Футболчи ўтган мавсумда барча мусобақалар доирасидаги 41 учрашувда майдонга тушиб, ўз ҳисобига 35 та гол ва 4 та голли узатма ёздириб қўйган. Transfermarkt портали ҳужумчининг қийматини 12 миллион еврога баҳоламоқда.
Португалиялик футболчи бунгача Мадриднинг “Реал” клуби, Туриннинг “Ювентус” жамоаси, Англиянинг “Манчестер Юнайтед” ҳамда Лиссабоннинг “Спортинг” клубларида тўп сурган. 2016 йилда эса Португалия терма жамоаси сафида Европа чемпиони бўлган.
Изоҳ (0)