Туркия ва Сурия халқаро автомобиль қатновларини тикловчи янги меморандум имзолади. Бу ҳақда Anadolu хабар берди.
Меморандум икки давлат ўртасида тўғридан-тўғри қуруқлик қатновларини тиклашга йўл очади. Туркия транспорт ва инфратузилма вазири Абдулқодир Ўролўғли келишув 2004 йилда икки давлат ўртасида тузилган “Халқаро автомобиль транспорти шартномаси”ни қайта тиклашини айтган.
Эндиликда юк машиналари товарларни бошқа транспорт воситасига ўтказмасдан чегарани кесиб ўтади. Бу эса савдо-сотиқни тезроқ, осонроқ ва арзонроқ қилади.
“Чегара ўтиш жойларида карго тугатилади. Бу юкларни қайта юклаш заруратисиз тўғридан-тўғри Туркия ва Сурия ўртасида ташиш имконини беради”, деди вазир.
Икки давлат Туркиядан Иордания, Саудия Арабистони, Бирлашган Араб Амирликлари, Қатар ва Форс кўрфазининг бошқа мамлакатларига тўғридан-тўғри транзит ташувларини амалга оширмоқчи. Туркия ҳамда Сурия расмийлари йўловчи ва юк ташишнинг турли йўналишларида ҳамкорлик қилиб, ўзаро ўқув дастурлари ўтказишни режалаштирган.
“Туркия ва Сурия ўртасидаги транспортнинг қайта тикланиши икки давлатнинг Европа ва Осиё ўртасидаги минтақавий савдодаги мавқейини мустаҳкамлайди. Шунингдек, у Транскаспий халқаро транспорт йўлагини Форс кўрфази давлатлари билан интеграция қилишга ёрдам беради”, деб қўшимча қилди вазир.
Сурияда 2024 йил декабрда Асад режими қулаганидан сўнг, ўтиш даври ҳукумати минтақавий қўшнилар ва бошқа давлатлар билан мустаҳкам алоқаларни ўрнатишга ҳаракат қилмоқда.
Изоҳ (0)