АҚШ президенти Дональд Трамп “Америка овози” радиостанциялари тармоғини “тўлиқ ҳалокат” деб атади ва конгрессдаги партиядошларини уни бутунлай йўқ қилишга ундади. Бу ҳақда у ўзининг Truth Social ижтимоий тармоғида билдирди.
“Нима учун республикачи демократларнинг ‘карнай’и бўлган ‘Америка овози’ (VOA) фаолиятини давом эттиришни истайди? Бу бутунлай тўлиқ, сўл ҳалокат. Ҳеч бир республикачи унинг сақланиб қолиши учун овоз бермаслиги керак. Уни йўқ қилинг!”, дея ёзган Трамп.
АҚШ президенти Дональд Трамп 14 март куни АҚШ ҳукуматининг Глобал оммавий ахборот воситалари агентлиги (USAGM) ва бошқа ҳукумат тузилмалари фаолиятини сезиларли даражада қисқартириш тўғрисидаги фармонни имзолади. Улар орасида “Озод Европа/Озодлик радиоси” ва “Америка овози”ни назорат қилувчи АҚШ ҳукуматининг Глобал медиа агентлиги (USAGM) ҳам бор эди.
Трампнинг қарорига кўра, баъзи давлат ташкилотлари ўз функциялари ва ходимларининг фаолиятини АҚШ қонунчилигида кўзда тутилган минимал даражагача қисқартириши керак эди.
Март ойида “Америка овози” ходимлари Трамп маъмуриятини телеканал фаолиятини ноқонуний тўхтатишда айблаб, Нью Йоркдаги федерал судга даъво аризаси киритди. Апрель ойи охирида АҚШ федерал судьяси Ройс Ламберт ҳукуматга “Америка овози” радиостанциясини ўз ичига олган АҚШ Глобал медиа агентлиги (USAGM) фаолиятини қайта тиклаш, шунингдек, агентликнинг барча ходимларини қайта ишга олиш мажбуриятини юклади. Қарор “Америка овози”нинг бир қатор ходимлари томонидан USAGMъни тарқатиб юбориш тўғрисидаги қарор юзасидан берилган даъво аризасини кўриб чиқиш жараёнида қабул қилинди.
Ўтган ҳафтада “Америка овози” радиостанциясининг 600 дан ортиқ ходими ишдан бўшатилди.
Таъкидланишича, ишдан бўшатилган журналистларнинг бир қисми июнь ойи охиригача АҚШни тарк этиши керак, чунки уларнинг иммиграцион мақоми янгиликлар ташкилотидаги иши билан боғлиқ эди.
Изоҳ (0)