“Ливерпуль” клуби собиқ бош мураббийи Юрген Клопп клублар ўртасидаги Жаҳон чемпионатининг янги формати ҳақида фикрларини билдирди.
Мутахассис бу футбол тарихидаги энг ёмон ғоя эканлигини билдирди.
“Мен иштирок учун тўланадиган пуллар жуда кўп эканини айтган одамларни тушунаман. Лекин бу ҳамма клубларга тааллуқли эмас. Ўтган йили Америка кубоги ва Европа Чемпионати бўлган. Бу йил клублар ўртасидаги Жаҳон чемпионати, кейинги йили эса Жаҳон Чемпионати. Бу шуни англатадики, футболчилар ҳам жисмонан, ҳам руҳан тикланишга улгурмайди.
Албатта, уларнинг кўпчилиги катта пул ишлайди. Бироқ келинг, бир дақиқа шундан узоқлашайлик. NBA ўйинчилари ҳам кўп пул олишади, аммо уларда йилига 4 ой таътил бўлади”, деган германиялик мураббий.
Клопп “Ливерпуль” ҳимоячиси Виржил ван Дейк бутун фаолияти давомида ҳам бундай дам олишни жамлай олмаганини айтди.
“Клублар ўртасидаги ЖЧ каби турнирлар футболчилар саломатлиги ҳисобига ўтказилмаслиги керак. Мен ҳеч кимга буни тиламасдим. Қўрқаман, келгуси мавсум футболчилар тарихдаги энг кўп жароҳатларига дуч келади. Агар бу келаси мавсумда бўлмаса, у ҳолда Жаҳон Чемпионатида ёки ундан кейин бўлади”, деган Юрген Клопп.
Мутахассиснинг сўзларига кўра, мураббийлар футболчилардан ҳар бир ўйинга гўёки бу улар учун сўнгги ўйиндай ёндашишларини кутишини айтди.
“Биз уларга буни йилига 70 ёки 75 марта такрорлаймиз. Лекин бу бошқача давом этиши мумкин эмас. Уларга дам олиш имконини беришимиз керак. Чунки агар бу бўлмаса, футболчилар узоқ муддатда самарали ишлай олмайди. Агар улар самарали ўйнай олмаса, бутун футбол олами ўз қадриятини йўқотади.
Менинг фаолиятимда фақат бир марта икки ҳафталик йиғин бўлган, ўша пайтда барча футболчилар менинг ихтиёримда бўлган. Икки ярим ҳафта. Шундан сўнг бир йил давомида деярли ҳар уч кунда битта ўйин ўтказдик. Бу даҳшат”, деган “Ливерпуль” собиқ бош мураббийи.
Изоҳ (0)