“Афросиёб” поезди рельсига бетон ташлаб, қўпорувчилик қилган темирйўлчилар узоқ муддатга қамалди

Самарқанд вилоятида йирик бетонни юқори тезликда ҳаракатланаётган “Афросиёб” поезди рельсига ташлаб қочган қўпорувчиларга суд ҳукми ўқилди. Бу ҳақда Давлат хавфсизлик хизмати хабар берди.

Маълум қилинишича, жиноятчилардан бири “Темирйўлинфратузилма” АЖ Бухоро минтақавий темир йўл узели “Зиёвуддин темир йўл масофаси” корхонасида темир йўл тўсиқлари бўйича бригадир лавозимида фаолият юритган. У Навоий шаҳрида яшаган, 1988 йилда туғилган. 2023 йил декабрда корхонада бригадир штат бирлиги тугатилгач, у йўл созловчиси ва темир йўл тўсиқлари қўриқчиси вазифасига ишга ўтказилади.

Лекин собиқ бригадир ўз норозилигини раҳбариятга кўрсатиб қўйиш мақсадида Кармана туманида яшовчи, 1992 йилда туғилган ҳамкасби билан жиноий режа тузади.

Улар жорий йил 14 январь куни кечки вақтда Самарқанд вилояти Пахтачи тумани “Бурқут” МФЙ ҳудудида жойлашган “Зиёвуддин-Навоий” темир йўл бекатлари оралиғининг 3872-км ҳудудига боради. Оғирлиги 110 кило бўлган темир-бетон шпални “Афросиёб” электропоезди ҳаракатланувчи темир йўл рельси устига кўндаланг ҳолатда қўйиб, воқеа жойидан яширинади.

“Орадан 15-20 дақиқа ўтиб, Тошкент-Бухоро йўналишида 159 километр/соат тезликда ҳаракатланаётган, жами 148 нафар йўловчиси бўлган “Афросиёб” тезюрар поезди темир-бетон шпал билан тўқнашади. Бунинг натижасида поезднинг ҳаракатлантирувчи қисмларига жиддий шикаст етади”, дейилади манбада.

ДХХ ходимлари бошқа ҳуқуқни муҳофаза қилувчи органлар билан ҳамкорликда тезкор-қидирув тадбирлар олиб борган. Натижада мазкур шахслар ушланиб, уларга нисбатан Жиноят кодексининг 161-моддаси билан жиноий иш қўзғатилади ҳамда тергов олиб борилади.

“Жиноят ишлари бўйича Навбаҳор туман суди томонидан эса қонунбузарлар қўпорувчилик ҳаракатини содир этганликда айбдор деб топилиб, уларнинг бирига 13 йил, иккинчисига эса 12 йил муддатга озодликдан маҳрум қилиш жазоси тайинланди”, дея қайд этган ДХХ ахборот хизмати.

Ўз навбатида қўпорувчилик ҳаракати натижасида жиноятчилар томонидан “Афросиёб” поездига 260 миллион сўм миқдорида зарар етказилгани аниқланган. Пуллар давлат ҳисобига ундирилган.