Ўтган ҳафта давомида Греция, Испания, Болгария, Черногория ва Альбания бутун Европа бўйлаб бир вақтнинг ўзида авж олган ўрмон ёнғинларига қарши курашиш учун Европа Иттифоқининг фуқаро муҳофазаси механизмини ишга туширди. Бу ҳақда Брюсселда ўтказилган матбуот анжуманида Европа Комиссиясининг расмий вакили Ева Хрнчирова маълум қилди.
Унинг айтишича, Испания буни биринчи марта амалга оширган. У Францияда жойлашган иккита recsEU самолёти ёрдамга сафарбар қилинганини ва улар бугуноқ ёнғинни ўчиришни бошлаши кутилаётганини қўшимча қилди.
“Европа Иттифоқи мамлакатларига, шунингдек, бошқа мурожаат қилган давлатларга тезкор ёрдам кўрсатиш учун иттифоқнинг турли ҳудудларида ёнғинга қарши авиация жойлаштирилган”, деди Хрнчирова.
Греция ушбу механизмни 12 август куни ишга туширди. Бунга жавобан ҳозирда Болгарияда турган Швециянинг иккита recsEU вертолётини жойлаштириш режалаштирилмоқда. Ёнғинни ўчиришда Чехия, Молдова ва Руминия ўт ўчирувчилари ҳам иштирок этди.
Болгарияда олти мамлакат - Чехия, Словакия, Франция, Венгрия, Руминия ва Швеция авиацияси, жумладан, Швецияда жойлашган recsEU вертолётлари сафарбар этилган.
Альбаниядаги ўрмон ёнғинларини ўчиришда Хорватия, Болгария, Италия, Чехия ва Словакиядан, Черногорияда эса Чехия, Хорватия ва Италиядан recsEU ҳаво воситалари иштирок этмоқда. Сербия, Венгрия ҳамда Босния ва Герсеговина ҳам икки томонлама келишувлар доирасида авиация воситаларини жўнатган, Австрия эса қуруқликдаги ўт ўчириш бригадаларини таклиф этган.
Таъкидланишича, мавсумда Европа Иттифоқининг фуқаро муҳофазаси механизми бутун қитъада ҳалокатли ёнғинларга сабаб бўлган иссиқлик тўлқинига қарши курашиш учун аллақачон 16 марта фаоллаштирилган.
Бундан аввал Рекорд даражадаги иссиқ Испания ва Португалияда йирик ёнғинлар чиқишига сабаб бўлгани хабар қилинганди.
Қайд этиш лозим, бу йилги жазирама ва қурғоқчилик Европада кенг кўламли ўрмон ёнғинларини келтириб чиқармоқда. Оқибатда 2025 йилда минтақада деярли Люксембург майдонига тенг ҳудуд ёниб кул бўлган.
Изоҳ (0)